阿B欠獎運：連提名都冇
鍾鎮濤（阿B）演過不下80部電影，不少叫好叫座，亦帶旺對手林鳳嬌、張曼玉、葉童等榮登影后寶座。可惜阿B卻欠缺攞獎的運數，甚至連一個提名亦沒有。
沒有統計過自己拍過幾多部電影，但心裏有數，約佔四分之三的電影都幫到老闆賺錢，可惜偏偏幫不到自己在電影上贏過任何獎項，明白一切時也命也。雖然自己沒攞獎運，但卻係拍檔的「福星」。我第一部接拍的台灣電影《小城故事》大獲好評，女主角林鳳嬌便憑這部戲首次奪得金馬影后，之後與葉童演出的《表錯七日情》及張曼玉的《不脫襪的人》，亦帶旺兩人首次成為金像獎最佳女主角，相反自己連提名也未試過，好似阿倫（譚詠麟）都係金馬影帝，所以佢有「幸運倫」之稱。經歷人生起落，學識多角度睇嘢，能夠做到「旺人攞獎」自己都開心。
推工作陪女兒
近年香港和內地以「合拍」形式拍電影和電視劇，慶幸自己有不少製作人賞識，畀我好多機會，但過去一年我就推咗至少四、五部戲。我當然不是嫌錢腥，而係我這個年紀清楚自己要做甚麼，如果只顧返內地不停拍戲賺錢，就會錯過陪伴兩個女的成長。
不過，有一個人會為他例外，就是我老友劉鎮偉。和劉鎮偉相識很久好啱傾，以前找我演戲的人不是要我演文藝小生就是戇直青年，就只得劉鎮偉獨具慧眼，幫我在周星馳的《新精武門》中打造了「瀟灑哥」的角色，能夠在星爺的電影成功搶到鏡很厲害，這個「瀟灑哥」形象至今在內地影迷心目中仍很深印象。（完）
日日是好日
戲裏戲外，B哥都是「瀟灑哥」，面對人生起伏，都瀟瀟灑灑的跨過了。眼前的B哥從無半點架子，身邊沒帶助手，穿上紅色外套牛仔褲灑脫非凡，當提到三個寶貝女，又立刻變成「柔情爸爸」：「如果唔係嚟做訪問，我就去咗湊女放學呀！」B哥現在的金句是「日日是好日」，因他只會選擇記着開心事。
口述：鍾鎮濤 文：音樂組