Santino被星爺寸爆鵪鶉

近日網友自製一段名為「周星馳寸Santino鵪鶉」的片段，惡搞星爺於電影《喜劇之王》中教張栢芝扮鵪鶉片段，以暗寸Santino的追女招過時。而另一段「溝女王何金水盛女大挑戰」中，則引用星爺於電影《行運一條龍》飾演茶餐廳侍應何金水的對白：「溝女得兩個字，就係要英俊」，網友加插盛女Florence奄尖難搞的一面，接上星爺一段只動用強而有力臂彎就可以，實行得啖笑！

暗寸有人放料

Santino日前被爆教學員召妓，間接承認「有帶個處男去體驗吓」，昨日他即轉軚︰「當日我係同記者講冇，只係啲學員話夾錢叫我夾埋一份，唔係我主意，成班人去咗，但我冇上去。」對於有錄音帶指他開迷幻派對的報道，他只說不知錄音帶來源，強調不做犯法事。

對於Santino因接載趙碩之而扯上關係，他暗寸有人放料︰「我唔識趙碩之，只係我個朋友識佢，唔知點解一載佢就有人跟。」他表示不會理會圈中人的批評，更無意做幕前工作。

趙碩之怒還拖

另外，趙碩之被問到Santino暗寸她「放料」，趙碩之說：「其實我同女仔朋友走時已知有人跟，只係我朋友覺得當時冇必要同佢（Santino）講。佢開車都冇品，又主動撩人砌車！（你覺得佢點？）大把人評佢，我唔評啦！我唔識佢，同佢冇乜深仇大恨，但我識Norris，我feel到佢唔會刻意唱Santino囉！」

文︰專案組

場地︰IPOSH