陳慧琳一盅兩件幸福滿瀉

上月剖腹誕下細仔小龍包劉琛（Riley）的Kelly，昨日趁小龍包農曆滿月之喜，公開囝囝玉照與大家分享喜悅。Kelly在博客上載七張照片，見她手抱熟睡的小龍包，用鼻尖及面頰輕撫囝囝臉龐，非常溫馨。有9磅重的小龍包眼線長長，應該跟靚媽咪同樣有雙大眼睛，Kelly更鬼馬扮作小龍包留言：「大部分親戚朋友話佢似爹哋多啲，你哋話呢？」事實上小龍包跟哥哥蝦餃仔（劉昇）一樣似足爹地Alex，不過小龍包的下巴及嘴仔就似Kelly。

陳慧琳感謝各界關心和祝福。	Alex因怕醜而不願上鏡。	蝦餃仔很錫小龍包，最鍾意睇細佬沖涼。

暫時收爐唔追女

美中不足的是，Kelly發放的照片未見一家四口，據知因為Alex怕醜不願上鏡。不過Alex每日都會親自為小龍包影相，記錄囝囝成長過程。萬千寵愛的小龍包獲公公送上六位數的「金龍」，嫲嫲亦封了大利是。問Kelly收到老公甚麼禮物？她笑說：「我哋講心唔講金！」她更爆老公秘密，指Alex上班時經常掛念一對寶貝仔。Kelly又稱小龍包跟哥哥一樣好大食：「佢冇乜扭計，成日食飽就瞓。」既有蝦餃仔，又有小龍包，Kelly笑言「一盅兩件」，幸福得很。

Kelly昨晨接受查小欣電話訪問，她坦言不會為小龍包擺滿月酒或百日宴，一家人簡單食飯慶祝。雖然她恨生女，但卻有意「收爐」：「唔好搞咁多嘢，呢啲天意。呢一刻一定唔想生住，啱啱先復原，又嚟嘅都幾係嘢。（老公呢？）我諗佢呢一刻都唔想生住。」

餵人奶致腰骨痛

親自餵哺人奶的Kelly雖然覺得不算辛苦，但有時餵到腰骨痛，要做一些伸展運動紓緩。她又稱不急於修身，因為要調理好身體：「同未生之前仲差五磅。」Kelly更得代言的餅店設計及製作點心蒸籠「小龍包」甜點，送給親友作滿月禮物。

計劃下月底復工的Kelly，已獲不少品牌邀請出席活動。她亦開始灌錄新碟，剛派了翻唱哥哥張國榮的《春夏秋冬》，更是佗住小龍包時錄音，她笑言感覺好特別。

文：音樂組