鍾鎮濤晒鵰：好彩冇被拉
鍾鎮濤（阿B）和溫拿度過青春歲月，當年溫拿紅遍整個東南亞，五兄弟經常出埠登台掘金吃喝玩樂，亦難免做些輕狂事，有次阿B和譚詠麟（阿倫）在沙巴更夜闖禁區坦蕩蕩裸泳「晒鵰」。
溫拿樂隊在1973年組成，活躍於1978年，當年在全東南亞Band壇來講，我夠膽講句是溫拿最紅，無Band能比。幾十年前我哋已經到泰國、馬來西亞等地登台，我們的經典歌《Sha La La La》和《I'll Never Dance Again》更成為泰國當地成人騷的表演音樂，到依家我哋都係摸不着頭腦。
後生仔難得身在外地，總會做啲瘋狂事，有一次我和阿倫喺沙巴，由朋友車我哋夜晚出去遊車河，行經一個好靚的沙灘。因為沙灘附近都係燈火通明，倒影喺海上變成一點點燐光好吸引，加上天氣酷熱，我同阿倫忍唔住跑到沙灘，除晒衫褲游夜水。當時我哋都覺得好奇怪，點解沙灘人影都冇個，之後才知我哋誤闖禁區，好彩冇畀人發現，否則我哋兩個裸男被拉，就搞出大新聞了。
溫拿「橫」行房間
又有一次，我哋五子到馬來西亞檳城登台，完騷後返酒店沖涼，當年大家都習慣唔閂房門，個個沖完涼都只着底褲跑出來，喺大家房間和房間四圍走，當時陳秋霞都在場，我哋五個就只顧嘻嘻哈哈鬧着玩，她都無當係一回事。反而畀我發現我哋都着住一模一樣的白色三角褲，相當合拍。我哋溫拿五子多年嚟友情能夠「千載不變」，全靠音樂將我哋聯繫，明年係溫拿40周年，不過因為大家都有自己的計劃，所以不會搞演唱會，幾時先搞？要待45或是50周年與歌迷見面也未定。
口述：鍾鎮濤 筆錄：音樂組