周國豐 叫細仔做X先生
已故著名律師周啟邦兒子周國豐本周一再做老竇，令本育有一子的他，湊成「孖」字。連日來他每天都往養和醫院探望太太黃泳霖和B仔Alastair，預計明日便會出院返家。
昨日他於活動中表示想為Alastair搞百日宴，講到BB中文名，他說叫住「周禮X」先，事關要等高人蔡伯勵夾過時辰八字先得；原來大仔周禮淳個名，都係蔡師傅改嘅。另外，周國豐又在facebook與友分享一張BB出世第三天的照片，只見BB面頰紅卜卜，嘴仔展露微笑，非常可愛，周國豐更表示會按傳統，大派雪茄慶祝，喜悅之情表露無遺。