馬浚偉：靠運動走出陰霾
一副略帶少爺仔氣質的馬浚偉，驟覺是富貴人家出身兼在外國留學返港入娛樂圈的藝人，當事人屢屢被誤會誓作澄清，還指自己是屋邨仔，未成年便已打工賺錢養家，還得照顧患癌母親，至母親離世後更傷痛得患抑鬱症，幸而靠運動釋放負能量才走出陰霾。
我年輕時大部分時間都放在屋企，照顧患鼻咽癌的媽媽，好少去玩……我根本冇乜輕狂歲月o架！直至1999年阿媽走咗，我當時正為劇集《非常保鑣》宣傳，心情真係好難受，shotshot哋添……媽媽去世這個打擊，令到我很抑鬱，當時醫生確診我患抑鬱症要定時食藥！
返老還童
過渡期間，身邊朋友都覺得我情緒大上大落，當時我未有信仰，要靠與朋友傾訴、用工作令自己平靜過來，最後更開始接觸運動，打乒乓球、羽毛球等，運動可以釋放負能量，近年我班朋友覺我返老還童，整個人都陽光咗！
宅男始祖
講真，我媽媽最後走咗，卻讓我減輕了心理負擔，因為在我成長期間的廿二年裏，我是長時間照顧媽媽，那段日子除了拍戲便返家，很少在外食飯，性格的確有點自閉，所以我堪稱是早期的『宅男』！而爸爸就擔起全頭家，他揸巴士養育我們一家七口，錢雖然不缺但亦不是大富人家，但很多人卻以為我是番書仔，其實我是屋邨仔，我14歲就開始出來賣雪糕，前港姐李嘉欣、陳淑蘭都見過我啦！」（完）
後記 打開心扉
馬浚偉聲稱自閉，雖是早期的事，筆者當下接觸卻覺得他健談得很，大抵是他將早年沒有講的說話，留來今日滔滔不絕的話題，令到訪問過程相當開心呢。
口述：馬浚偉 筆錄：影視組 服裝：Bally 場地：Sky21 攝影：劉智源