超盈Iris齊插Monna借刀殺人
「爆E超蓮」鍾采羲（Iris）是賭王何鴻燊千金何超盈的夜蒲腳，向來姊妹情深。超盈早前只在社交網站笑指Iris腦殘，卻被「有心人」斷章取義二人關係決裂。超盈和Iris不忿被挑撥離間，昨於微博暗指放料者特徵是去慣馬場獵仔，分屬Iris同門的o靚模林宜芝（Monna），更指Monna擅於借刀殺人！
擁有E Cup巨胸的o靚模Iris是非多多，早前更無端捲入一單中環爭仔打交事件，更是無妄之災。賭王千金超盈作為Iris的夜蒲腳，對於Iris連日來的遭遇一時手痕，於facebook笑指對方經常因「無腦」惹禍，即被有心人穿鑿附會，放料屈她們關係決裂，幾達有你冇我局面。
暗寸馬場獵仔
不和報道一出，對於監生被人挑撥離間，超盈和Iris即時火滾，馬上向身邊人了解，勢要揪出幕後黑手。在明查暗訪下，據知超級是非精，正是跟Iris曾因爭拍寫真月曆，搞到面和心不和的同門師妹Monna。
超盈和Iris姊妹情深，昨日更於微博聯手對抗外敵，暗名爆出黑手是誰！超盈率先寫道：「發覺現在網上嘅嘢已經毫無私人空間，因為之前同朋友開的小玩笑令到鍾采羲Iris身邊的小人有機可成（乘），好一招借刀殺人！心計重得連傳媒也利用，作故事的人，請你以後小心言行，不管你的目的是甚麼，請不要麻煩我！」
Iris未幾回覆超盈，令黑手身份呼之欲出，她寫道：「那麼多無聊時間遍（編）故事去害人，倒不如好好努力工作，有時間跟佢D（啲）『好友』去馬場吹下風好過……唔好意思，無啦啦用咗你個名做新聞sorry dear！」擺到明暗指黑手是斷正馬場獵仔的Monna。
記者致電Iris，對於微博所指的爆料人，是否正是Monna？她不置可否，並說：「已經寫到好明，圈子咁細，啲人做過乜心知肚明，最慘係搞到朋友同屋企人！」Iris認為黑手居心叵測，令人憤慨，更怒插對方：「做埋啲損人不利己嘅嘢，不知所謂！」
直認關係麻麻
超盈和Iris聯手把矛頭插向Monna，但Monna卻否認自己是放料人，堅稱不認識超盈，她在電話激動說：「吓？咁奇怪？無啦啦話我？之前我都有聽過佢同超盈鬧交，但我邊有講出去？我唔識超盈，更加冇佢facebook，好多人都去馬場啦！」Monna更直言跟Iris關係麻麻，並非朋友，她說：「不嬲關係麻麻哋，平時都係做嘢先見面，好少講嘢，我都唔明點解佢咁多負面新聞，我最多只係話我住凱旋門同去馬場！」問到與Iris和超盈見面會否打招呼和尷尬？她說：「唔尷尬，都會打招呼！」Monna為了自保，就連觀音都擺上枱：「我信觀音，對得住天地良心！」
文：專案組