拆解是非免受困擾蔡卓妍笑罵由人

做藝人有時候只是表面風光，捱更抵夜不在話下，最困擾的還是緋聞是非。入行十年的蔡卓妍就認為食得鹹魚抵得渴，而出身自演藝世家的謝婷婷慶幸不諳中文，才減少傷害！陳樂榣被誤當「小姐」覺得最受侮辱，難怪她氣難平！

蔡卓妍「呢啲報道，其實有八成係假，兩成係真，不過自己都明白食得鹹魚抵得渴，而且我對得住良心，係我朋友都知邊啲係事實！」

謝婷婷懶理亂作「都係啲雜誌亂寫，佢哋成日用啲舊相作新古仔，啲相都唔啱日子，不過好在我唔識睇中文。」

姚書軼突出招妒「女仔多嘅地方就有是非，我聽到有人咁講囉，不過自己突出優秀先有人講，聽到梗會好激氣，大家係朋友都講我是非？後尾諗番知佢係出於妒忌。」

陳樂榣小姐嬲爆「當我仲係組合Freeze成員，第一年有人話我係出嚟做（小姐），又有傳媒同朋友話我係再造人，梗會唔開心，後來啲人先慢慢改變。佢哋咁諗可能因為我係性感組合，啲人接受唔到。」

鍾采羲冇踩住上「我個人直腸直肚又唔介意人眼光，入咗行好多時同女仔共事，成日畀人誤會，話我踩住人上位，其實根本冇啲咁嘅事。」

李蘊被屈到喊「以前讀緊中學時，有同學將某同學嘅筆盒放入我櫃桶，嗰個同學就話我做乜拎佢啲嘢？當時覺得好委屈就喊咗出嚟。」

劉心悠澄清緋聞「近排同鄭嘉穎傳嘅緋聞，一啲都唔係真，我好介意，就算澄清咗都冇人信，我已經好鄭重咁一次又一次澄清，話畀人知呢啲唔係事實。」

莊思敏桃色誤會「冇乜特別中傷我嘅說話，就算有我都唔記得。試過有誤會囉，有男友同前女友之間有誤會，個女仔話我搶佢男友，呢種事好難解釋，所以我都由佢咁諗。」

劉晨芝流言無助「網上成日都有啲人亂講嘢，說話不負責任，試過話我身材係假，最衰係話同過我一齊拍拖，但我係完全唔識嗰個人，好明顯全部唔係事實。對呢啲網上流言我好無助，太過分嘅話會交畀公司處理。」

拆解是非 免受困擾 蔡卓妍笑罵由人