男友浪漫驚喜 Cara G.嗌shut up
混血名模Cara G.上月與男友Jesper在菲律賓度過了令她最難忘的一次旅程，因男友趁此行向她求婚，但她竟叫男友「shut up」。計劃下年結婚的她一直很喜歡小朋友，婚後隨時ready做媽咪。
Cara G.曾表示男友Jesper不夠浪漫又欠缺情趣，想不到上月Jesper就給了她一個畢生難忘的驚喜，令她甜入心兼冧到暈。Jesper為她打造了一個浪漫甜蜜的求婚之旅，Cara說：「事前我完全唔知道，出發嗰朝佢晨咁早就叫醒我，同我講我哋依家去菲律賓旅行喇，仲已經執定行李等我，我當時覺得好surprise，同埋覺得佢好鬼馬。心諗佢一定係知我近排忙住搞Cafe，好辛苦，想帶我去休息，Relax下，所以就好開心咁出發喇。」
冇戒指當講笑
此行他們在當地逗留了四日，其中一天他們到了一個漂亮的小島去露營，因島上沒有其他人，兩人便赤裸身體去感受大自然，Cara說：「我哋喺島上跑嚟跑去，又喺海灘游水，游游吓見到日落，真係好靚，就喺呢個時候，Jesper竟然向我求婚，問我願唔願意嫁畀佢，當時氣氛好浪漫，不過我見佢都冇準備戒指，以為佢只係講笑，我就話『shut up，你係咪呃我架咋，你都唔係講真嘅』，後嚟我哋瞓喺沙灘上休息時，佢再同我講佢係認真嘅，我先至say yes。」
婚後隨時生B
Cara表示，打算明年五月正式下嫁Jesper，問到生BB計劃，她說：「我冇特別嘅planning，我好鍾意小朋友，婚後隨時都ready架喇。」
文：名人組