江若琳硬頸：握拳拒認錯

因為我媽媽是做老師的，所以細個嗰陣家教很嚴，只要做錯好小事，例如唔記得叫「早晨」，媽媽就會鬧我沒禮貌；只要遲咗講「唔該」，媽媽便會鬧我同罰我。記得有次媽媽的朋友來我家，請我食零食，我明明已講了多謝，但因忍不住即時打開食，結果auntie一走，媽媽就請我食「藤條炆豬肉」，佢話人哋送嘢畀我，我唔可以喺人哋面前食，咁樣好冇禮貌。

與母相依為命

雖然我無因為媽媽管得嚴而變得反叛，但我好硬頸。如果我覺得自己無做錯，我就打死也唔會認，我記得一年班時，媽媽冤枉我無講謝謝，其實只係佢聽唔到，那次無論佢點樣打我、罰我，我都握實拳頭企喺原地，咬實牙齦，無流過一滴眼淚。因為平時我做錯事一定會講對唔住同埋喊，她看到我這樣，嚇到呆咗，到依家佢仲會講：「細個已經咁硬頸，唔怪得之依家咁啦。」

可能因為媽媽很嚴，所以細個嗰陣好多嘢都唔敢同佢講，怕佢唔鍾意和鬧我。不過因為爸爸經常到內地上班，小時候我和媽媽可說是相依為命，我一日三餐都會跟住佢，還經常到媽媽的學校黐餐，因為媽媽的學校是全日制的，所以我放學後必定到她學校做功課，吃學校阿姐煮的飯。可能相處得多，其他老師都很錫我，當我半個女。至於爸爸，雖然他有時候一個月才回家一次，但因為他永遠只會和我們打機，又不會罵我哋，所以即使見得少，都沒半點陌生感覺，反而每次見面都好開心呢。（完）

後記

「哎呀，啲假眼睫毛好鬼煩，搣咗佢先！」這是江若琳跟我們受訪的開場白。認識江若琳多年，對於她的結論是：每次不用工作，她最愛以素顏look示人；每次談天，她總是挖心掏肺盡訴心中情；在筆者眼中，她是不折不扣的開心果。她還有一個搞笑習慣，就是每次外出必定戴帽子，而且每每將帽子拉得很低。

江若琳表示，可能因為以前有不少負面新聞，為免被人指指點點而戴帽出街。不過江若琳無奈地說：「無論我點樣喬裝，都一定有人認得我。」

口述：江若琳 筆錄：影視組