薛凱琪示愛食檸檬
薛凱琪（Fiona）日前為新歌《All you need is me》拍MV，不避嫌找來緋聞男友方大同Rap歌及做MV男主角，歌曲描述一對男女的對話，女生主動示愛，認為兩人走在一起定會幸福快樂，但大同填寫的Rap詞卻向她大派檸檬，晒命形容身邊有好多女仔，可以慢慢揀，不想這樣快定下來。
唱出心聲
Fiona憑歌寄意大膽向大同示愛卻被拒，難怪她撒嬌說：「佢好鬼衰，特登整鬼我，但首歌真係好好玩，大同唱歌好聽，佢講英文的聲線幾動聽。」Fiona坦言歌曲唱出自己心聲，自嘲在感情上屬超級細膽的她笑說：「完全係我想講，但唔夠膽講嘅心聲，我好佩服啲女仔追男仔，因為現實生活中自己做唔到，所以咪喺電影同歌曲度去做，我每次拍拖都希望長久，都會好肯定畀到幸福對方，唔肯定的話拍嚟做乜？」
造型有趣
MV中Fiona大玩三個不同造型，最愛黑白神秘女郎look，她說：「仲喺隻眼度黐咗黑色喱士，感覺好神秘特別，花咗幾個鐘頭轉妝都值得。」雖然歌手唱快歌時形象通常性感，但她笑說：「性感就唔使睇薛凱琪。」
而大同就身穿西裝，成個紳士咁款，但Fiona就嫌太過正常，她笑說：「我唔畀佢咁正常，所以同形象指導諗啲新嘢，幫佢件西裝逐塊黐上桃紅色螢光波點，不知整得幾靚。」
文：音樂組