江若琳︰論盡性格改唔到

我細個嗰陣真係好曳，媽媽一度懷疑我有過度活躍症！我試過去媽媽朋友屋企玩，我唔知點解咁大膽，喺人哋的梳化跳咗足足兩小時，將白色的梳化踩到變成了灰色。不過呢啲都係小事，細個嗰陣我仲因為玩得太瘋狂，以致傷痕纍纍。香港某醫院的醫生就曾經很驚訝的同我講：「又係你呀？細路！」我想那間醫院我大概「拜會」了五次左右，每次都很大鑊的！

首先講講我臉上其實有個藍色的點點，因為小時候我喺學校跑來跑去，結果唔小心將塊面撞向老師手持的藍原子筆上，那支筆直插入臉！我又試過看電視看到悶了，知道媽咪在煮雞湯麵，就無聊地走去玩雞湯，結果成煲滾熱的雞湯淥到大腿。

江若琳誤將裙子當作披肩着上身。

論盡的江若琳，亦試過練劍時整傷同事。

最經典 筆芯插嘴唇

我又試過在家中沖涼，唔知點解趕住衝出客廳，結果喺成地泡的情況下跣落地，仲撞穿頭，初時仲嘻皮笑臉的爬起身扮冇事，直到發現自己成手血後，才知驚和識得喊！有一次很經典的，那時媽媽正在打蠟，因為心急想聽爸爸講八卦嘢，就拎住鉛芯筆衝出客廳，結果當然是整支筆插入嘴唇，要做手術將插了入嘴唇的筆芯「掹」出來。

裙子當披肩

其實我論盡的性格到依家都改唔到，入行後仲係烏龍事一籮籮。好記得有一次，造型師已好清楚話我知哪件是上衣、哪件是裙，點知到最後我將裙子當作披肩！奇怪的是，我着那套衫時已覺得怪怪的，感覺下身好似冇着褲咁，但我都係穿着影相……真係好笨呢！　

口述：江若琳 筆錄：影視組