思琦聞吳帥：已冇關係！
單親媽咪楊思琦產後昨日首次亮相公開商業活動，12萬酬金袋袋平安的她谷奶上陣搵奶粉錢，就連貓兒亦被吸引伸手「探究」。表現堅強的思琦三度開腔，強調與被指是女兒經手人的吳帥再無任何關係，劃清界線！
思琦在美國誕下愛女楊卓穎（Krystal）後，積極部署回港搵奶粉錢。昨日她自產後首度亮相在港舉行的商場騷《大埔超級城 × Nohohon優悠貓遊歐陸音樂城開幕禮》。據知，原定開價10萬元的思琦，最終亦加價至12萬才答應亮相，昨日她駕車和自備服裝到場。
新手湊B吃力
身穿黃色連身裙的思琦心情開朗，大晒積極修身成果，但其逼爆上圍仍非常壯觀。當她抱起貓兒玩弄時，貓兒亦按捺不住將手伸入其胸部窺探，嚇得思琦驚惶失措，表現尷尬，工作人員見狀即上前「營救」。
楊思琦受訪時透露開奶粉和餵人奶同時進行，笑言餵人奶令「谷奶」效果更顯著，同時幫助子宮收縮加快變瘦。她說：「新手湊小朋友開頭吃力，BB頸、身體又軟又細粒，好在媽咪教換片、沖涼。」
問到女兒父親是否吳帥時，她避忌地說：「已經冇任何關係！（有冇聯絡？）一切從新開始。（協議分開？單方面分手？）我哋冇任何關係架嘞！（對方有太太？）唔回應，亦唔評論！我依家第一位係小朋友。」問到親生父親若想見BB怎辦？她說：「已冇任何關係。（打官司爭？）大家唔使擔心，你哋仲緊張過我。（男方表明唔會要小朋友？出世紙有冇父親名？）我會照顧BB，畀100%愛心佢。（你知道自己做單親母有冇感到徬徨、有冇搵母親的抉擇求助？）我嗰時唔喺香港，過去咗，依家生咗小朋友，其他嘢唔諗。」
否認患抑鬱症
有指吳帥在微博慨嘆楊母很難搞，思琦表示不是事實不回應，亦不會放上心。她強調入行至今一直努力工作，亦換來慳妹稱號，辛苦賺錢買樓無依靠過任何人，現在亦要積極賺錢生活，並自稱經濟絕無問題。現場有記者打趣問她騷價是否廿萬才正確，她說：「太抬舉我嘞，開心價囉，好滿意。」有指她患上產後抑鬱症，思琦說：「你哋覺得有咩？冇呀！我不嬲係樂觀開心人，唔會將唔開心嘅嘢影響BB，希望有正能量嘅。」她承認單親媽咪的路難行，但有信心做個好媽媽。
思琦又透露在美國待產時有收看劇集《結‧分@謊程式》，問看見前男友李泳豪演出有何感覺？她說：「過咗去，唔想自己嘅事對對方造成騷擾。」至於如何處理與泳豪共養的狗仔？她稱已再沒有聯絡，暗示不會取回遺下的物件。再問日後工作碰頭或合作會否尷尬？她說：「返工好正常，朋友見到面都會打招呼。（仲係朋友？）係呀！」
文：影視組
攝：追蹤組