洪天明獲老婆舊愛道歉熄火
洪天明因與周家蔚婚宴當晚被家蔚前度男友林建億（Chester）踩場，而興爆大鬧對方正X人，事隔數日Chester知錯親致電天明道歉，天明亦大方予以原諒，家蔚昨日稱：「都過去咯，天明原諒我就原諒啦！而Chester都有打畀我道歉！」
剛在內地工作返港的洪天明，昨日在電話中承認前晚的確收到Chester和其母親王愛倫來電道歉，而他亦因畀面繼母高麗虹的好朋友王愛倫，所以決定不再多談事件，不再追究。
畀面王愛倫
問到天明今次事件是否動員全家的連帶關係來傳話，最後才平息？天明說：「王愛倫同高麗虹都係港姐，大家又係朋友，佢同我媽咪講咗，而我阿爸（洪金寶）又再搵我講，咁我咪應承唔再提囉！尋晚王愛倫同佢個仔Chester都有打過電話畀我道歉，而Chester亦承認自己嗰晚貪玩，但都係真心嚟祝賀，我覺得人誰無過呢，所以我都接受道歉，咁我都畀面王愛倫！但我當日講出嚟，只係想畀人知佢唔係我哋嘅朋友！」
生B前驗身
煩事解決後，昨問到天明可有生BB喜訊公布？天明說：「未呀！可能龍B就趕唔切，我成日都忙，而我都要驗多一次身，（身體情況有問題？）因為早前跟曾志偉去過日本做嘢，我都應該要驗吓身睇吓有冇輻射影響，做個負責任嘅爸爸。」至於家蔚昨在電話中亦稱Chester有親自打電話向她道歉，遵從老公天明意思，她亦不再追究。
文：影視組