陳豪男人40 keep住攞滿分
下月將踏入41歲的陳豪，入行以來演過無數角色，他期待有一天導演會找他飾演爸爸，戲路上有更大變化，他亦希望與女友陳茵媺並肩演好戲，好讓觀眾給他倆一張滿分成績表。
當我仲係三十幾歲嗰陣，從來冇諗過導演會叫我演爸爸角色，因為當時個樣都仲好年輕，但當踏入40歲，自己都feel到成個人成熟咗，40歲之後嘅戲路，我想試多啲新嘢，遲啲做爸爸角色都唔介意，唔同階段要接受唔同角色，每個人都會老，大家都會走樣，所以就要keep，喺唔同階段keep住個競爭力。
從拍檔偷師
我成日都幻想幾時有導演叫我演爸爸，我諗會演得幾開心，事關我好鍾意同小朋友合作，覺得佢哋超得意，喺我未有自己小朋友之前，咪當學下點同小朋友相處。之前睇三哥苗僑偉喺《缺宅男女》入面做爸爸角色，佢演得好好，真係要好好向佢偷師。其實仲有好多同事都好值得我學習，喺合作過程中不斷吸收佢哋嘅經驗，好似蔡少芬、馬浚偉、劉丹、麥長青咁，佢哋都係我心目中嘅好演員。
教女友排隊
下個月我就踏入41歲，當然希望事業更加好，我同Aimme（陳茵媺）都有共識，依家係搏殺期，好想佢打好個基礎先，我成日同佢打個比喻，做呢行要排隊，排隊等機會，等到機會就要盡力表現，等觀眾評分，我希望同佢一齊進步，成績表一齊攞高分啦！（完）
後記：平易近人冇架子
陳豪（Moses）一直被譽為圈中筍盤，貴為無綫當紅小生的他卻平易近人、毫無架子。拍攝當天Moses要接受數間報館雜誌連串的訪問，他自備了十多套衣服更換，而且更衣速度超快，以掌握緊湊的拍攝時間。訪問完畢後，Moses即使已一臉倦容，但遇上粉絲要求合照，他亦「有求必應」，如此敬業樂業，難怪他可以踏上成功之道！
口述：陳豪
筆錄：專案組