陳豪：飲咖啡就輕鬆
除了陳茵媺、演戲之外，陪伴在陳豪身邊的還有他至愛的咖啡豆，近年他還愛上親自將生豆烘焙，然後精心研製出一杯香濃咖啡，這就是他認為人生的最大享受。
記得我第一杯飲嘅咖啡係細個喺澳洲時，喺一間咖啡店買嘅Espresso（特濃咖啡），由嗰刻開始愛上，佢畀我一種好舒服嘅感覺，令我覺得自由自在，感覺同返屋企一樣，有舒一口氣嘅感覺，就算你受咩壓力，只要飲咖啡就會輕鬆。好開心公司安排我主持《品味咖啡》，我真係學到好多嘢，近期播出添食嘅第二集，主要講咖啡產地，我去咗唔同地方嘅農莊，令我對咖啡有進一步了解，真係獲益良多。
最緊要有心機
以前我成日講飲咖啡係一種生活品味，依家我追求嘅係更深層次，我覺得要識enjoy每一樣自己喜歡嘅嘢，如果你唔知道咩係好壞，就算畀件好嘢你都唔識貨，依家我追求咖啡嘅質素，我近年鍾意自己烘焙咖啡，所以每一杯由自己烘焙出嚟嘅咖啡，都係一張成績表，邊度出錯邊度要改善都好講究，心機好重要，就等於一個家庭主婦，如果煮啲嘢唔好味，一試就知。
追求簡單生活
正如我工作追求好質素一樣，點樣令自己質素更高，就要不斷去磨練，吸收唔同經驗同知識，知錯要改，咁先會烘焙出最好嘅味道，否則只會自食其果。除咗咖啡呢個喜好，其實我對生活上偏向追求簡簡單單，最鍾意留喺屋企睇吓書、聽歌，對新科技就無咩大追求，我連微博都唔識玩，近期人人講好興draw something，我就連聽都未聽過，我唔覺得好out，只不過追求嘅嘢唔同啫！
口述︰陳豪 筆錄︰專案組