林欣彤Jeana街頭樂與露
近期感情生活精彩的詩雅和寸嘴「o靚」模何佩瑜（Jeana），昨日與歌手林欣彤（Mag）於銅鑼灣為新戲宣傳，Mag打頭陣獻歌，歌迷舉牌尖叫，而Jeana更是熱褲露腿上陣，自爆現在有六名裙下之臣追求。
歌手林欣彤、樂隊Mr.、詩雅和Jeana等昨日傍晚現身銅鑼灣街頭，為新片《起勢搖滾》造勢，吸引過百粉絲和市民圍觀，期間因人太多有幾名軍裝警察前來了解情況。Mag打頭陣即場獻唱，她甫現身即接受Mr.訪問，直言於街頭與粉絲見面非常開心，而她的歌迷則舉牌尖叫，其後Mr.接力Rock爆街頭，掀起高潮。
自爆有半打仔追
至於Jeana則收起「不倒胸」以短褲上陣，提到早前與張栢芝弟弟張栢文撐枱腳斷正後神情慌張，她急急解畫︰「因為食緊飯而且冇化妝，怕影出嚟醜樣，我同朋友出去時都唔化妝，唔介意畀人睇。（個樣再修飾？）唔會。」她強調現正單身，又指與對方是好朋友︰「大家識咗3年，係朋友介紹嘅，影到之後都冇聯絡，亦唔會尷尬。」她又自爆追求者近半打，她說︰「依家揀緊，自己唔心急，好enjoy單身，都有半打追求者。（栢文好多對手？）只係朋友，唔好講對手。」
詩雅今年旺桃花
此外，同場的詩雅早前被本報拍到與西裝男約會，她澄清當日是為新戲《紮職》請教對方法律知識，她說︰「佢係朋友介紹畀我識，因為之後拍新戲演專業人士，所以問佢法律嘅意見。」提到經常被拍到與不少男士外出，她說︰「係好事，好似多咗桃花咁，自己唔抗拒拍拖，但依家未有真命天子。」她又表示感受不到有男士追求，坦言男士送禮不重價值，心思才重要。
文︰專案組