陳豪醒覺靠自己搵錢

由細到大，我對娛樂圈都好有興趣，所以由澳洲返嚟之後，93年加入咗電影圈，一心要學做戲，就算做二打六都無所謂，之但係夢想同現實係兩回事，人哋點解要畀機會你先，你係邊個先?我試過半年冇工開，咁我要開飯，所以之後都轉咗去做Model，間唔中拍戲，所以當時自己可以話對電影完全唔知發生咩事，覺得好空洞，直至入番電視先追求最基本嘅嘢，我拍電影嘅日子，講真我每一日都諗住離開！

雖然我媽咪當時都有為我事業擔心，甚至成日想畀錢我用，不過我唔要，我細細個已經同阿媽講唔要，我要自己一手一腳搵番嚟。我想學習咩叫生活，因為我知道唔欠過人錢，無畀追數佬鬧過，係唔會學識點樣去理財。我係一個好着重實踐嘅人，唔好同我講咩理論，我一定要靠自己從經驗中去摸索。

二百蚊用四日 唔敢坐車

我試過呢張卡數找嗰張卡數嘅日子，情況都幾嚴重，以前欠人十幾萬數，真係窮到褲袋得二百蚊使四日，連坐車都驚無錢，所以地鐵唔敢坐，由旺角行去尖沙咀，搭兩蚊船去中環，再行去銅鑼灣！點解欠人錢?都係名利累事，有錢就亂買嘢，覺得係一種權力，唔理有幾錢，淨係使，之後先發覺出事，無錢點算好?我走去做傳銷，但因為sell嘢又得罪晒啲朋友，慢慢變得市儈咗、現實咗，迷失咗自己，後來有朋友同我講，我先即刻反省自己，放棄做傳銷。之後我遇到以前嘅經理人許願，佢話幫我接觸TVB，因為TVB係我最後一步嚟喇，如果唔得咁就算數，我亦係由加入TVB一刻先開始學番做戲。

口述：陳豪

筆錄：專案組

攝影：謝國華