陳慧琳出院 睇形勢追個女
天后陳慧琳（Kelly）昨午帶同二子「小龍包」出院，精神極佳的她悉心打扮，穿上短裙現身。Kelly透露已為「小龍包」取名劉琛，意指珍貴，問到會否再追一個女？她即瞪大雙眼：「畀啲時間我，睇清楚個勢先！」
「潮媽」陳慧琳上周三入院開刀產下二子「小龍包」，昨午在經理人鍾珍及助手陪同下帶同「小龍包」出院，但老公劉建浩（Alex）則未有現身。容光煥發的Kelly，身穿紅褸紅裙及有矮踭的短boot，明顯經過悉心打扮，身形依然瘦削，完全看不出已是兩子之母，而鍾珍就負責拎BB籃上車。
「琛」寓意珍貴
Kelly透露已為「小龍包」取名劉琛，而「琛」字的國語拼音與自己的「陳」字相同，她說：「解珍貴，好難得先有，英文名係Riley，純粹我鍾意，覺好聽就改。」
Kelly謂現時身體不錯，不過最重要是兒子健康，她又透露與Alex會代「小龍包」送禮物予「蝦餃仔」：「『蝦餃仔』鍾意車，會送車畀佢。（掛住「蝦餃仔」？）好掛住，依家返去睇佢！」剛生完便穿上短裙的Kelly似乎不怕吹親？她說：「唔驚，今日咁熱。」
問到為何不見老公接出院？Kelly說：「佢一早返屋企打點，同埋睇『蝦餃仔』，應該搞掂晒。」並笑言姑娘謂「小龍包」食飽就瞓好易湊，希望回家後亦然。
木瓜湯谷奶水
問到何時拍全家福發給傳媒？Kelly謂：「等我抖吓先，啱啱做完手術，畀啲時間我。」Kelly表示生仔很辛苦，現飲一些谷奶湯水，如木瓜湯準備餵人奶。問她會否多追一個女？她即瞪大雙眼表示：「等我諗清楚先，（諗幾耐？）畀啲時間我，睇清楚個勢先！」
劉琛啱做娛圈
陳慧琳細仔「小龍包」取名「劉琛」，堪輿學家麥玲玲表示：「劉琛命格屬金，為『食神傷官格』，雖然讀書唔太出眾，但其表演天分高，非常適合於娛樂圈發展，佢十幾歲時會往外國讀書。」
堪輿學家陳子才亦表示：「劉琛幾歲大就會有賺錢能力，好有機會做童星，兩兄弟嘅感情會好好！」
文：音樂組