Mr.做好音樂搣甩Copycat

我哋新碟《Misterdays》已經出咗街，完全唔擔心畀人又話抄歌，如果擔心埋呢啲問題不如唔好出碟，出得碟梗係對自己隻碟有信心，最緊要監製同公司對我哋有信心，因為依家出碟對我哋嚟講唔係一份工作咁簡單，因為有好多Mr.歌迷好期待我哋嘅歌。就算有讚、有批評，我哋都盡責任去做好音樂畀大家！如果我哋只在意畀人惡意搵我哋「抄襲」嘅地方而唔努力去做音樂，亦改變唔到事實架，況且音樂總有人鍾意同唔鍾意。

MJ	Dash	Alan

尊重他人

我哋做歌係聽成隻歌嘅感覺，當然有時聽番會感覺似某啲歌，但成首歌嘅旋律唔同，每次作歌我哋着重大家夾歌嘅時候個畫面係乜嘢，公司亦有叫我哋隨心去做！音樂係心情、藝術，用嚟抒發感受，吓吓計算似邊首歌，或者似乜乜就唔係好音樂。有時我哋聽到某啲歌似邊隻歌都唔會講出嚟，會尊重番歌手同作曲人，自己有意見係咪一定要去抨擊其他人呢？不如嘗試去聽吓首歌入面係咩訊息同背景。

Tom

Ronny

自我懷疑

其實每次報道出街我哋都會「哈哈」就算，當然唔開心一定有，但好快冇嘢，有時覺得依家嘅音樂究竟係乜嘢呢？我哋曾經有懷疑過大家（指自己同歌迷）係咪仲鍾意音樂呢？其實周圍都有音樂喺度，每年都有金曲誕生，身為音樂界嘅其中一分子，點解要諗得咁負面？加上我哋有五個人，大家各有所長，有信心可以做出好嘅音樂。

感激家人

雖然我哋負面新聞好多，但絕對係好幸運，出道獲公司支持，好多前輩提攜我哋，屋企人又冇反對。好多時上一輩會覺得夾Band冇前途，反對自己個仔夾Band；我哋屋企人就默默支持同煲湯畀大家飲，喺香港我哋係比較好彩嘅一隊Band。夾Band梗係有拗撬，講冇都唔信啦，不過係誤會居多，相處有一定嘅磨擦，每個人都有自己意見，好多時都係由Dash細佬做和事佬，佢係局外人會客觀啲，不過大家拗完會自動波去傾番，未試過激氣到大打出手。

Band仔收入少：最難過都算捱過

入行前都知夾Band收入唔多，依家收入已經好咗好多，亦叫做穩定，見好多商場同周年晚會啲老闆多咗搵Band做騷，所以依家啲Band嘅收入有好多來源，冇以前咁辛苦。我哋有五個成員，收入係會分薄咗，但五個人一齊去承受壓力同做音樂會，條數又喺番度啦。

有啲人會覺得我哋搵好多錢，其實我哋同普通市民搵錢差唔多，相當於打工仔做咗幾年嘅收入！加上我哋冇乜消費，啲錢大多數用嚟買樂器，最難過嘅環境都算捱過，當然希望生活可以再改善，但未來冇人知，相信嚟緊嘅日子會更艱難！但我哋有個Believe，就係我哋五個人就算有咩事都會一齊去孭，最緊要唔會做一啲損人不利己嘅嘢，亦有信心夾得好隊Band！

性格迥異各有焦點

Mr.五子各有所長，性格各異，主動派有Dash、MJ，文靜派有Ronny、Alan及Tom。

MJ

結他手MJ雖與前DJ女友卓韻芝分手多時，仍要回應對方的新戀情，對於傳媒焦點屢屢落在感情事上，MJ表示不後悔公開戀情：「大家係行內人明白傳媒嘅取材。（日後唔公開戀情？）唔會刻意，順其自然，當然希望大家將焦點放喺我哋嘅音樂上啦。」

Dash

低音結他手Dash是五子中最「多嘢講」一位，每次受訪都是由他發言，他笑說：「都係為大家發聲，可能我講嘢夠官腔，所以『隊』我出嚟面對傳媒，相信班兄弟唔會介意，加上我夠長氣嘛，我又唔係爭住講。」Dash自嘲是個好長氣的歌手。

Alan：主音Alan早年因「爭女」捲入桃色事件，甚少說話的他成追訪對象，更要獨自面對傳媒，他說：「其實我係一個好低調嘅人，冇乜嘢畀人講，感情事更加唔會掛喺嘴邊，全部都放喺音樂入面表達出嚟。（好少講嘢？）係，說話比較直，所以好少講嘢，怕講錯嘢。」

Tom

鼓手Tom去年與「陽光妹」何思諺拉埋天窗，近月更榮升老竇，「家事」被成為焦點，Tom說：「唔介意大家去問，已經習慣咗，知道好多記者出於關心，所以都好大方去講。（擔心BB被追拍？）唔會刻意去避，唔可以畀太多保護佢，有啲嘢佢係需要承受。」

Ronny

結他手Ronny是隊中最少發言的一位，感情上比Alan更低調，雖然與女友感情穩定，但甚少在傳媒面前提起「女友」兩字，他說：「我好怕鏡頭，對住啲陌生人更加少出聲，只會聽，有時覺得做幕後好過幕前。（少提女友？）大家生活咁普通，唔太特別同刺激。」

採訪：音樂組　　攝影：司徒國榮　　場地：通利琴行