天明家蔚洞房hold住有心無力

洪天明與周家蔚繼大前晚舉行婚宴，正正經經招呼完親朋後，昨日再假W酒店為八百位大癲大肺的好友特設豹紋結婚派對，現場布置皆以豹紋作裝飾，大批圈中玩得之人：郭富城、陳百祥、黃杏秀、阮兆祥、陶大宇、呂慧儀、江欣燕與老公、歐陽震華與太太、羅敏莊、何傲兒與何傲芝、麥長青、楊天經、HotCha、薛家燕、陳展鵬、陸詩韻等均有出席，其中疑似大肚的麥家琪更腹大便便到場，齊賀一對新人。

四十幾人食「春藥」

天明與家蔚昨午率領湯盈盈、梁靖琪、唐詩詠、陳倩揚、鍾麗淇、姚樂怡、李思欣等28人龐大姊妹團，以及錢嘉樂、謝天華、方力申、林文龍、唐文龍等的13人兄弟團見傳媒，天明說：「都唔明點解咁多姊妹，但對兄弟都係好事。今晚有啲賓客忙，好似謝霆鋒咁，就嚟唔到。今晚主題係豹紋，實則係『玩我哋兩個』。（洞房未？）婚宴完咗攰到瞓着，但呢樣嘢唔使擇日，幾時都OK，不過今晚應該唔得，我哋兩個聽日都要做嘢。」

天明與家蔚的圈內兄弟姊妹團大擺型甫。	周家蔚低胸tube dress，散發新娘子性感。	天明與家蔚在派對上，任一班姊妹團「凌辱」。

天明表示無懼賓客們刀光劍影的劈酒考驗，他說：「做晒心理準備，預咗被人隊，唐文龍話預備咗四十粒解酒丸，（唔驚換成春藥？）唔驚，若然真係春藥，四十幾人一齊食，應該都幾開心。」

郭富城百忙中抽空到賀。	汪詩詩（左）與汪圓圓姊妹無懼風大，以性感低胸裙亮相。	鍾嘉欣透視裙赴宴，性感搶眼。

覓得有情郎的周家蔚，接受電子傳媒訪問時一度感動落淚，幸福滿瀉的她說：「婚禮之後，天明攰到暈咗，我四十幾個鐘冇離開過酒店房——瞓覺，都有同表弟、表妹傾天光。（冇時間洞房？）聽講生龍Ｂ要喺四月前，今晚應該唔得。好開心好多外地朋友嚟香港見證我結婚，我喺呢個圈六年，如果冇朋友就好有問題，我真係好多交心姊妹。」

志偉斥姊妹團唔係人

而無綫昨日在《東張西望》中，播出天明在姊妹團脅迫下，講出愛的宣言，他說：「婚後我會努力做好自己，希望可以創一番事業，工作好緊要，我希望可以做番啲成績。」家蔚聽罷勁冧回應：「我都會好好照顧你！」

曾志偉昨晚出席派對時說：「我今晚係嚟隊天明飲酒嘅，佢應該冇能力行番落台，嗰28個姊妹都唔係人，唔幫天明，仲隊埋天明一份！（你幫天明頂酒？）我頂佢呀！我都冇預我可以行番落台。」

文：影視組