諸葛嫁入薛家 法拉冇茶飲

現年29歲的Marie與32歲的薛嘉麟昨日共諧連理，曾傳與Marie不和的「妯娌」陳法拉昨日有份在男家見證二人的結婚儀式，據知一對新人有按傳統斟茶給雙方家長，但就未有斟茶給薛嘉麟的長兄薛世恒及大嫂法拉。

Marie與薛嘉麟的婚禮照足傳統儀式，早上新郎身穿中式禮服及卜帽由大宅出發，與4名兄弟及8名轎伕跟隨大紅花轎前往女家接新娘，隨行還有兩名大妗姐一左一右邊行邊大叫「大紅花轎接新娘，接過新娘喜洋洋」等吉利說話，場面熱鬧。經過連串玩新郎遊戲，薛嘉麟成功接得美人回男家，三踢轎門後，代替大妗姐孭新娘入屋，並在聯波活佛見證下進行婚禮。

至於薛嘉麟稱早上有斟茶儀式，問到有否斟給兄長及法拉時？他不肯正面回答，並嚴肅說：「斟茶係好莊嚴儀式，花邊新聞唔想講，今日想講番我哋自己。（斟茶都係一個焦點？）個焦點應該係放喺我哋度。（大哥同法拉有冇嚟？）今日好多人嚟見證我哋。」

「大嫂」上台祝酒

禮宴於晚上約7時半假會展舉行，身穿Tube Dress的法拉單拖現身。會場設有兩圍主家席，分男家及女家，法拉被安排坐在男家主家席，她與Marie中間隔着薛世恒及薛嘉麟而坐。近9時半，大會司儀要求男家親友上台向新人祝酒，法拉與薛世恒十指緊扣上台，足證法拉的大嫂地位！

「我真心祝福佢」

其後法拉接受訪問，問到有沒有去接新娘？她說：「我喺男家，所以見唔到接新娘情況，但有見到Marie落轎，好得意。」不過問到Marie有否斟茶給她時，法拉避而不答：「好多長輩喺度。（你係阿嫂？）未算，我自己Keep住有飲茶。（你受唔受得起？）呢個好難定義。（細佬爬頭結婚，要捐過大佬褲浪？）冇聽過，我見唔到有呢個儀式。（即係代表你結咗婚？）唔代表啲乜，我喺外國返嚟，唔識呢啲。」

法拉又表示場內太多人，未有機會與人合照，問到是否與Marie破冰？她否認不和：「冇冰，何來破？（關係轉好？）唔係傳聞咁，傳聞係傳聞，我係真心祝福佢。（Marie對你嘅稱呼會唔會唔同咗？）後生呢批都係叫英文名。」法拉稱一直有結婚念頭，沒有被長輩催婚，一切順其自然，今次當取經。

文：名人組