子丹最強過招Chok贏奇洛

為支持本地電影製作培訓，有關機構昨晚假灣仔君悅酒店舉行慈善晚宴籌款，邀請逾200位嘉賓出席，繼有荷里活影星奇洛李維斯、甄子丹、吳彥祖夫婦、莫文蔚（Karen）、日本「妖男」Gackt等，星光熠熠。

不約而同以黑色型佬西裝亮相的奇洛與子丹，甫到場即吸引鎂光燈閃不停，雖然首度碰面，但二人惺惺相惜，不斷咬耳仔密密斟，子丹更提議奇洛擺功夫甫士拍照，奇洛即擺出個太極甫士，子丹亦Chok出功架配合，玩得興起的奇洛後來更踢腿示人姿勢騎呢，氣氛起哄，拍攝過後奇洛應公關要求步入後台，不過獲悉傳媒還未拍夠便折返，更搞笑地向鏡頭伸長頸滿足傳媒所需表現親民。

甄子丹和奇洛首度會面即以武會友。

汪詩詩看見老公和奇洛過招笑不攏嘴。

郁身郁勢似耍太極

雖然行色匆匆的奇洛面露疲態，但仍樂意接受訪問，被問到其新作《太極俠》是否受北京下雪天氣影響進度？他謂：「冇，嗰邊天氣好好，我都好鍾意香港，（幾時再嚟？）計劃兩個月之內再來，（同子丹見面感覺點？）佢好fantastic，Karen都係，（會唔會計劃之後有戲嚟香港取景？）我未知之後有咩工作，都想嘅。」

首次與奇洛見面的子丹表現興奮，透露有向奇洛表示是對方影迷：「佢好友善，同我講有睇過我嘅《導火綫》同《殺破狼》，仲話好好睇添，（有冇傾功夫話題？）冇咩時間，傾電影多，冇講太深入，不過見佢講嘢個身郁來郁去，好似耍緊太極咁，（之前受八卦新聞影響心情，依家見完奇洛有冇好番啲？）心情不嬲冇咩受影響，唔想講太多，今晚只講籌款。」談到前晚被拍到家族飯局，問到是否帶汪圓圓見家長？子丹笑謂：「有排啦！後生仔女拍下拖先，只要加讚係愛圓圓都會支持佢，（加讚好愛圓圓？）到依家都係個好貼心同very good男友，（有冇過兩招畀佢？）唔使啦！後生仔女等佢自己發展。」

李嘉欣唔認佗龍B

活動期間盛傳懷孕的李嘉欣與老公許晉亨現身酒店內等候司機，看見傳媒大感愕然，嘉欣腳踏3、4吋高踭鞋配上連身鬆身裙，問到是否想追龍B？她謂：「唔係，（有咗？）唔係，（知唔知奇洛喺呢度有活動？）唔知，係咩？」及後和許晉亨十指緊扣離開。

此外，奇洛李維斯昨午應香港國際電影節邀請出席年度國際大師班，大會邀請導演楊凡擔任訪者，內容探討數碼取代菲林拍攝的情況，奇洛認為菲林「未死得」，但承認《太極俠》負擔不起昂貴的菲林，改為採用DV（數碼攝錄機）拍攝，並希望在港取景。

甄子丹

年齡︰48歲

身高︰175cm

獎項︰2009年憑《葉問》獲得第二屆電影鐵象大賞最佳男主角等

代表作︰《導火綫》、《葉問》

擅長︰詠春、太極等多種功夫、彈琴

奇洛李維斯

年齡︰47歲

身高︰185cm

獎項︰94年憑《生死時速》於MTV電影頒獎禮奪最佳銀幕拍檔

代表作︰《生死時速》、《廿二世紀殺人網絡》系列

擅長︰曲棍球、彈結他

文：影視組