關楚耀 劉美君 煮融隔膜
關楚耀（Kelvin）日前邀得前輩劉美君上其飲食節目，他提到當年在日本涉藏毒返港後，被對方狂踩叫他「返去讀書」及「抖吓」，一直放在心的Kelvin終明白對方的好意，他說：「我唔會畀一、兩句打沉。」
關楚耀（Kelvin）與劉美君可謂「大纜都扯唔埋」，因環球唱片令兩人變成「母子」，Kelvin做節目主持第一時間想起「哎吔媽咪」，更親自炮製牛油香煎雞槌孝敬對方，獲劉美君大讚乖仔及加分，期間Kelvin提起當年被劉美君勁踩經過，他問劉美君：「記唔記得我哋第一次見面，我就畀你勁踩？」劉美君澄清說：「唔係踩你，只係叫你靜吓。」
問到Kelvin是否受打擊？他說：「係，佢仲叫我返去讀書，畀我感覺叫我唔好做，不過我份人好信自己，唔會畀一、兩句打沉，之後諗番其實佢都係為我好，想我出去睇多啲同增值自己。」對於劉美君大讚廚藝，Kelvin說：「幾鍾意煮嘢食，都係向女友偷師。」
直認心直口快
劉美君直認是心直口快的人，從不轉彎抹角，她說：「我性格率直，嗰時我真係覺得佢要靜吓，唔係急就得。」她透露23歲的大囡已亭亭玉立，她說：「佢跟得我多，依家識煮好多嘢。（咁你男友識唔識煮？）佢唔識o架，原本都想搵個識煮嘢嘅男朋友，依家放棄咗，留番洗衫、拖地家務畀佢做。」
採訪：音樂組