JC：佢係我嘅大姐姐
鬼妹仔性格的Jessica C.雖然待人熱情，但其實不是有很多朋友，最老友的就是同門師姐Ana R.及她的經理人，她與兩人無所不談，而Ana R.和經理人於她低潮時「雪中送炭」，令她大為感動。
我朋友唔算多，身邊嘅朋友就是父母、妹妹、經理人或者公司同事，要數最好感情嘅朋友，第一個會係同公司嘅Ana R.，因為大家嘅經歷相似，我哋都係美國人，喺海外做嘢都會掛住屋企人，而且好細個就出嚟做嘢，又係屋企大女，所以大家感同身受，一拍即合。
Ana好照顧我，佢會將好多自己嘅經歷同意見分享。記得啱啱紅的時候佢教我禮儀，因為我平時打扮隨意，佢就畀咗好多意見我，例如着衫要高貴啲，要有做藝人嘅典範。我哋又會分享感情事，佢係一個好好嘅傾訴對象，好似之前同Sergio嗌交，佢都有畀意見，而我剛分手時好瘦，佢就煮嘢畀我食，要養肥我，而我最記得當時爆出疑似淫片時我喺台灣拍緊戲，咁啱佢喺台灣做嘢，所以佢順道過嚟探我和鼓勵我，喺我心目中佢係飾演大姐姐嘅角色。
與經理人感情好
第二個就係經理人，我15歲就識佢，所以感情深厚，雖然唔係成日見，但一見面就會乜都傾，好似best friend，不過大家講電話就會變番工作關係，可能大家太熟，有時唔使講出口都知道對方諗緊咩。上年嘅負面新聞，大家的確有摩擦，因為大家都好大壓力，而且我是被動的人，會選擇唔聽唔回答，但經理人相反好主動面對，所以當時有分歧，當然大家會盡量配合，喺呢件事上面感情同時增進唔少。（完）
後記：
近期香港的天氣寒冷，當日於室外進行拍攝，吹着寒風，小記穿着厚褸仍充滿寒意，但JC只穿着薄薄的衣服拍攝專訪照，而小記見她凍得已起了「雞皮」，她亦未有怨言，還說︰「不用急，慢慢影到靚為止。」態度確實非常專業。
口述︰Jessica C.
筆錄︰專案組
攝︰倪立煌