諸葛要老公做大妗孭入門

薛家準新抱諸葛紫岐（Marie）下周二（20/3）便出閣，與男友薛嘉麟拉埋天窗，昨日她出席活動時被問到心情如何，她說：「講真又唔係好緊張喎，知道有事要發生咁。（有冇失眠？）冇，瞓得OK，我有食中藥。（準備好晒？）我呢邊係，要顧及嘅嘢唔多，淨係婚紗，靚呀！（會唔會食素嚟喼弗？）唔會，我食好多嘢都唔肥。」

跟傳統踢轎門

而Marie亦已落實當日會坐大紅花轎出嫁，她說：「由我依家嘅屋企坐到去奶奶度。（搵人抬同埋打鑼打鼓？）應該係咁樣，我都好期待，未試過。（未來老公會踢轎門？）佢有問過我可唔可以踢，話會好大力咁踢，我叫佢細力啲踢，跟番傳統。（大妗姐孭你？）應該係，但係我想主席（男友）孭我多啲，因為我好重，骨重，驚會壓親個大妗姐，同埋唔好畀佢咁易（娶到），有誠意啲，佢呢排已經好積極做運動。（嗰日會唔會玩新郎？）會，我叫咗班姊妹團唔好糟質得佢太緊要，要錫住佢。」問她是否怕未來老公會被玩到沒精力洞房？她即笑而不答。

諸葛錫住薛嘉麟，笑言要姊妹團玩新郎時手下留情。（資料圖片）

諸葛表示薛世恒會通知陳法拉出席婚宴。（資料圖片）

或斟茶畀法拉

對於有報道指陳法拉將缺席她的婚宴，Marie大賣關子說：「到時你哋咪知囉！（通知咗佢未？）通知咗大哥（法拉男友薛世恒）會通知佢。（係咪要斟茶畀法拉？）唔知，跟番傳統，睇大妗姐安排。（你婚禮咁盛大，法拉就咩都冇搞？）都預咗會有呢啲八卦新聞，嗰日最緊要老人家開心，唔顧得咁多。」她又否認自己得寵可入住九肚山豪宅，法拉卻冇份的傳聞。

另外，同場的陳嘉桓回應昨日本報獨家報道有關其母與經理人傳不和一事，她表示媽咪離開公司只為讓她更加獨立，更透露8月會開拍一部有關葉問的電影。

文：名人組