JC談家人:佢哋係我好朋友

親情比甚麼都更加重要,JC深明此道理,自小與家人關係非常好,父母在她眼中更是「好朋友」,經常互相傾訴心事。她又與兩位妹妹擁有心靈感應,實在非常難得。

我同屋企人感情一直以來都非常好,媽咪同我除咗係母女關係,仲係好朋友。佢喺我心目中係一個好sweet嘅人,我好細個已經入行做model,媽咪亦都好鼓勵我。而且佢嘅想法永遠都係正面,無論有難題或者做錯事,佢都會撐我。

同Daddy分憂

做咗model咁多年,都曾經試過氣餒,媽咪就同我講永遠都會做我後防,點都會撐我,成為我嘅工作原動力。做呢行成日都要周圍飛,但我唔係一個好鍾意搭飛機嘅人,所以每次出門都會打畀媽咪報告行蹤,咁會安樂啲。

相反我就係Daddy嘅好朋友,佢係一個有趣嘅人,喺美國時我哋可以一日通5次電話,講好多無聊話題。我跟Daddy同媽咪嘅關係差唔多,如果我有難題就會同媽咪講,Daddy有難題就會搵我傾。

三姊妹心靈相通

除咗父母之外,我同妹妹感情亦非常深厚,細個我哋喺農場生活,居住嘅地方冇電視同玩具,幾姊妹成日一齊玩,生活好淳樸,而大家的關係都特別close。最記得係大家好似有心靈感應,我哋三個人三間房,試過一個人喊,其他兩個都會一齊喊。我身為大家姐都好錫妹妹,見到佢鍾意嘅嘢,都會買咗畀妹妹先。之前妹妹被起底,其實我有唔開心。因為如果我被人影到,就算好定唔好我都會接受,但唔希望影響妹妹私隱,我想保護佢,呢啲係做家姐要做嘅嘢!

口述:Jessica C. 

筆錄:專案組 

攝:倪立煌