星級家長防「拐」 郭晉安：捉到要處斬
拐子佬突然出現，令不少星級家長人心惶惶，紛紛表示會全天候（目及）實仔女。新劇中演皇帝的郭晉安更「皇上」上身說要拉拐子佬處斬！
范姜
呢單新聞出現真係好驚，出街都唔會畀佢離開視線範圍外，學校方面都加強措施，家長接小朋友要出示家長證，同核對清楚學生同證件相相符先放人，絕對唔會畀唔識嘅人有機會接走個女。
郭晉安
講到咁恐怖，梗要睇實啲，同個仔形影不離啦！個仔平時返學放學都係我哋接送，所以唔太擔心，而且學校保安都幾好。我最想知拐子佬個動機係咩？知道咗動機先可以對症下藥。至於啲拐子佬捉到真係要拉去處斬！唔好搞啲小朋友吖嘛！
洪欣
每次囝囝返學放學、參加課外活動，我都會接送，平時只會畀佢自己落樓買吓雪糕咁，因為佢都十一歲，佢曾經叫我唔好接送，我同佢講媽咪會擔心，佢就冇再要求嘞。
黎耀祥
我個仔讀緊中二，大個仔唔係好擔心，佢平時都係自己返學放學。我覺得學校唔需要做咩措施，上到中學識得照顧自己o架喇。
張智霖
囝囝由家人帶放學，有親人負責比較安心，依家都要加強防範、提高警覺，總之拐帶行為真係無恥，100%唔應該咁做。
汪詩詩
我聽朋友講先知有拐子佬呢件事，我一向親自送小朋友返學放學，出入都有司機同工人，所以會好安全。我有教仔女唔好同陌生人接觸，亦會同工人開會，提醒佢哋要注意。
曹永廉
新聞傳出後老婆同囝囝學校嘅同學及家長，相約去內地主題公園玩，我要開工於是變咗長氣爸爸，不停同個仔訓話，又同佢一齊睇新聞解釋清楚。其實我好懷疑嗰啲人嘅動機，可能另有企圖。
莫可欣
其實呢啲個案成日都聽到，只係近日傳聞多咗，有時防不勝防，惟有自己盡量小心啲，人多嘅地方我會（目及）實囡囡，教佢唔好同陌生人講話。依家有啲商場人流多、品流較複雜，盡量唔好同小朋友去咁多。