陳奕迅請保鏢護醒目女
近日香港驚現拐子佬，在名校、商場、港鐵、遊樂場等地向小孩埋手，搞到家長們人心惶惶，圈中星級爸媽都驚惶失措，名模趙嘉懿的一歲多兒子，個多星期前曾被疑似拐子佬（目及）中，幸好及時發現斥退疑人。至於視愛女如掌上明珠的陳奕迅（Eason）和徐濠縈為保護七歲的康堤安全，考慮請保鏢貼身護駕。
香港近日接連爆出疑似拐帶案件，匪徒專向小學生埋手，警方重案組已接手調查。圈中父母級藝人亦如驚弓之鳥，廿四孝父母Eason和徐濠縈，對掌上明珠康堤（包包）疼錫有加，兩公婆驚聞有拐子佬出現，即時商量應付對策，實施十級戒備。
阿徐接受本報電話訪問，坦言被拐子佬事件嚇親：「好驚！昨晚同Eason傾過，我哋都好擔心，連陳家上下老人家都打電話畀Eason，叫我哋睇緊啲包包嘅安全，其實平日我都會親自接送包包返學，如果我同Eason帶唔到，就會叫工人同司機幫手，佢哋做咗好多年，當包包女咁，而且學校範圍好安全，我都好放心。」
要小心陌生人
阿徐謂愛女好醒目，平日對陌生人好敏感，別人請她食糖也不會要，她亦不會讓工人帶包包出街，她會再三提點女兒小心陌生人。問會否請保鏢？阿徐坦言：「以前有諗過，嗰時覺得冇需要，不過依家拐子佬事件，我會同Eason再商量吓。」身為人父的Eason亦小心使得萬年船的說：「我同意老婆咁講，商量吓囉。」不過，為免被拐子佬（目及）中，他笑說：「我冇搵咁多錢，拐子佬應該目標未到我哋啩，成日咁多狗仔隊跟，壞人都未必埋到我個女身，哈哈！」
Eason和阿徐擬請保鏢原來有先見之明，據知，名模趙嘉懿的一歲多兒子，於個多星期前曾被疑似拐子佬（目及）中，趙嘉懿接受本報電話訪問說：「有次我同媽咪、工人帶囝囝去兒童樂園玩，自己喺附近商場買嘢，媽咪就企喺門口，只有工人和囝囝入裏面玩。」
正在逛街的嘉懿，突然收到工人電話：「佢話有一男一女追住囝囝，話囝囝好得意，請佢食糖，工人大嗌搵我媽咪，媽咪入去睇發生乜事，點知嗰兩個人都唔走，擾攘咗一輪，我嚟到佢哋先話走，但一直喺附近徘徊，我即刻抱囝囝走，唔知係咪拐子佬。」幸好趙嘉懿最後都是虛驚一場，囝囝安全無恙。
琦琦角色扮演
名模琦琦亦十分緊張女兒安全，她說昨日開始同囡囡做角色扮演，叫工人扮壞人，訓練囡囡遇到壞人要高聲叫救命，囡囡聽到拐子佬消息都好驚，她教女兒遇到壞人要避開，幸而她的學校保安好，自己亦管接管送。至於張栢芝，對於Lucas、Quintus的安全素來極之重視，栢芝經理人余先生表示：「兩個小朋友平時都有五、六個人幫手湊，栢芝喺香港仲會親自接送返放學、帶出街，唔喺香港就一定會叫家姐、媽咪幫手睇住，確保兩個小朋友嘅安全。」
文：音樂組