陳靜拒戀富二代 尋100分男友
有錢又靚仔的富二代被視為城中筍盤，更成為普遍港女「私有化」目標，但好嘢多人爭，現年22歲擁有fit爆身材的陳靜（DaDa）卻認為富二代花心兼缺乏安全感，她直言愛情應講心唔講金，故繼續在森林中尋找心中的理想好男人！
了解+體諒+交流=擇偶條件
我拍拖唔會公開，之前講過唔介意，但諗深一層唔需要公開，只會答大家係好朋友囉，咁我先保障到自己嘅私人空間。其實我要嘅嘢好簡單，搵男朋友唔使大富大貴，只要佢了解我、體諒我，交流先最緊要！而且我比較大女人，唔需要男仔畀好多嘢我，我要嘅可以自給自足，唔係用錢去衡量，反而係大家共同努力建立家庭。
所以，我唔鍾意富二代架，之前有富二代追過我，亦都試過同佢哋食飯或者出街，但我覺得感覺好遠，而且唔想畀人誤會，所以唔會接受人哋嘅嘢，加上大部分富二代都有條件花心，我要嘅係專一男友，佢眼中只有我，我眼中只有佢嗰種！
10年差距係極限
如果我認定咗個男仔，就算相差10年我都OK，當然呢個係我極限！我仲後生，想搵個開心拍拖嘅男友，但唔可以唔成熟。之前嘅男友類型好唔同，但都係好好嘅哥哥。
同Gary（Square成員）係青梅竹馬，好細個就識，不過佢好怕醜，連摸我隻手都驚會面紅，嗰時我會覺得：幾時先拖我隻手呀？要做好多主動去引導佢，好有初戀感覺；王宗堯就係大哥哥，佢大我十年，才華型，我仰慕佢嘅才華所以同佢一齊。當然，依家同佢哋兩個都係朋友，見面唔會尷尬，但唔會翻撻，因為感情已經完咗，唔會再諗！李雨陽係認識階段，大家好朋友，相信我喺佢心目中應該都唔差，唔係佢都唔同我做朋友啦，但依家未有時間處理感情事。
冇諗過「封胸」
兩年前入行時好自然行性感，當然唔會過自己嘅底線，最後性感幫到我多咗知名度、工作同收入，我反而好感恩，亦係運氣！因為我唔覺自己特別靚，又冇乜才能，讀書又唔叻，係普通到唔普通嘅女仔，所以入到呢行真係好幸運，又有穩定收入，我仲挑剔啲咩呢？
我得22歲，要行性感唔多唔少都有壓力，曾經有個時期好驚，記得影完第一本寫真後，個個搵我接性感工作，我好驚自己係咪着唔番衫呢？着得比較密實又畀人問點解，自己都有掙扎過，但好快冇嘢，因為呢度有條跑道畀我去努力！我呢一年好畀心機做戲，去請前輩學演戲，其實係想畀人知我唔係只得性感，之後聽到啲人讚我唔只性感仲有演技，真係好有滿足感，估唔到咁多人鍾意我個角色。
其實好多性感女星都可以成功轉型，所以我冇諗過「封胸」，我唔覺得係錯事，只係工作需要，有身材先着得起件衫嘛！但我會畀自己一段時間喺呢個圈入面，因為我都要結婚生BB，會有自己嘅家庭。
感激母親支持
我係一個好重視家庭嘅人，可能因為我喺單親家庭長大啦。媽咪同我家姐係我最親嘅人，媽咪好錫我，而我同家姐由細到大感情都好好，但呢兩年忙工作好少陪家人，我好唔開心，覺得自己好唔孝順，我家姐BB出世我都冇去探佢，到依家BB出咗世咁耐只係見過BB兩次，但我以前應承過家姐佢BB出世會去，結果做唔到，真係好唔開心！
媽咪係永遠都支持我做任何事嘅人，其實我知佢好擔心，但我真係冇時間同佢哋解釋我平時做嘅嘢，唔敢叫佢哋睇我嘅戲，或者同佢哋講太多我做嘅嘢！但我發覺依家除咗工作，我唔知有咩去同佢哋溝通，呢樣嘢我覺得好唔孝順！我有同自己講，上年要畀多啲時間陪屋企人，但最後都係冇時間。
後記：談家事變大喊包
親情最可貴，長大於單親家庭的DaDa相信感受至深。訪問當日，DaDa本來充滿笑聲，但一提到因工作跟家人疏遠，倍感內疚，結果她那份抑壓於內心的情緒突然釋放，流出兩行眼淚，助手及小記也來不及反應，當場被嚇呆。
口述：陳靜
筆錄︰專案組
攝影︰沈健程
場地及服裝︰IPOSH