王維基明剷暗寸 張可頤無綫頭上動土
翻起「電視台風雲」的城市電訊，昨日在無綫地頭將軍澳舉行製作中心動土儀式。部分無綫舊將力撐新主，黃日華一句「多發揮」，張可頤一句「好自由」，暗寸娘家多掣肘，老闆王維基亦出言配合冷嘲幾句。那邊廂，效忠無綫的阿姐阿哥不甘示弱，挺身捍衞娘家聲譽。
張可頤、黃日華、林文龍等齊齊加盟王維基旗下的城市電訊，昨日出席製作中心的動土儀式，黃日華孖住老闆王維基舞獅為儀式揭幕。昨日這班「叛將」於娘家地頭動土外，又力撐新東家，踩無綫不尊重藝人、自由度低、制度舊式。昨日現場風雨飄搖，王維基手執泥鏟象徵動土後，於台上致詞時說：「有啲涼呀！唔知風生水起，定係王維基搞風搞雨。」之後他又指他們的製作會以實景拍攝，不會有亞加力膠玻璃，題材亦多元化，不會一味拍爭產、愛情劇集，明寸無綫經常被嘲布景差、題材狹窄等。
新環境限制少
被指是「一哥」的黃日華表示上星期已簽約，先拍一部科幻偵探劇，他謂：「同啲導演傾過都幾難拍，因為唔想用太多特技。（係咪編劇、導演都係無綫舊班底？）全部都識，大家溝通容易啲，呢度新環境、限制冇咁多，可以發揮吓佢哋想像力。」
之前炮轟無綫「Totally Very Bad」的他被問到怎樣形容新公司時，他以港式英語笑說：「Can Do Independence，王生畀好多空間大家發揮，又可獨立形式去做。」問會否力邀兄弟苗僑偉過檔？他謂：「我諗佢哋都傾過，人各有志，佢同TVB仲有約，佢都話觀察吓先。」
娘家舊制難改
至於「一姐」張可頤表示下半年才開工，與譚耀文、劉美君合作，她說：「同王生合作好自由，冇年期，逐部劇傾，做完開心就再合作。（比無綫吸引？）唔使講啦！大家都明白無綫制度唔可以一時三刻去改，我都要搵適合自己做嘢嘅地方。」她表示將來會否與無綫再合作，一切要睇緣分。
而簽了兩年約的林文龍表示現時可多些時間留港，盛讚新公司自由度大。而以嘉賓身份出席的前無綫編審張華標，最終也承認簽了合約。
文：影視組