李文標遊樂園晒「父女」情
前無綫藝人李文標，在英皇電影《逆戰》中飾演挾持主角謝霆鋒女兒的壞蛋，並因而與飾演霆鋒女兒的馬來西亞天才童星李馨巧結緣成契父女。早前二人趁空檔到香港主題樂園遊玩，文標更大讚馨巧雖然年紀小，但為人很體貼。
馬來西亞天才童星李馨巧，與前無綫藝人李文標因合作拍攝英皇電影《逆戰》成為好友，更結成契父女。問到首任契爺的文標為何對馨巧情有獨鍾？他笑謂：「佢令我好感動，因為拍《逆》好多追逐戲，有個場口我足足跑成過千公尺，隻腳好疲勞，咪坐喺休息室度捽咯。點知馨巧見到，就叫佢媽咪過嚟慰問我，仲話要介紹醫生畀我，當時我見到馨巧仲做緊功課，就覺得呢個細路女好細心、好乖。」文標在《逆》片中雖演反派，更一度有份挾持馨巧，但馨巧不但不怕他，更大讚他好人：「佢送好多禮物畀我，我全部都有好好收藏。」文標指加上馨巧演戲甚有天分，故此對她疼愛有加。馨巧亦笑言契爺送了很多禮物給她，全部她都珍而重之地放在櫃子裏，她說：「有支契爺送嘅原子筆我好鍾意，一直到依家都唔捨得用。」
玩遊戲鬥高分
早前李馨巧來港為《逆》片配音，文標知道馨巧愛去迪士尼，專誠抽空與太太胡櫻汶帶馨巧到該處遊玩，性格活潑的馨巧無論見到卡通氫氣球或是珍寶恒星均表現興奮，文標笑言她最鍾情的機動遊戲是巴斯光年：「我同佢鬥高分，個個都以為我贏梗，點知第一鋪我輸喎，唔知佢係咪畀機會我，話要玩多次，結果畀我贏番，哈哈！」文標又指對《逆》片票房成績理想感欣慰，並透露台前幕後一直很團結，他又指大家都期望電影能開拍續集。
文：影視組