李曼筠北京拍戲凍僵腳趾

近年興北上搵銀，李曼筠早前亦加入吸人仔行列，遠赴北京拍戲個半月，由於當地天氣已經零度以下，儘管Maggie帶了成篋厚褸，但仍然凍到震，她說︰「真係凍到抽筋，啲腳趾凍到冇晒知覺，加上拍戲要着高踭鞋，自己又冇帶到襪去，真係失策。」

袋六位數

Maggie表示每日拍完戲後便會即時衝返酒店，然後躲在被窩中「冬眠」，她笑言曾因太凍連晚飯也不願吃，她說︰「如果成日冇我嘅戲份，我真係可以成日都唔離開張被半步，啲工作人員仲以為我病咗。」

為了保暖，Maggie出盡法寶，暖包暖水袋跟身外，還經常食辣和打邊爐暖身，但她大嘆非常熱氣，她說︰「餐餐都食呢啲真係好熱氣，但為咗暖身冇計，反而我唔驚食呢啲嘢會生暗瘡。」

雖然Maggie於內地拍戲吃了不少苦頭，但唔辛苦點得世間財，Maggie透露今次北京拍戲已袋了六位數人仔，收入可觀，她說︰「今次酬勞好滿意，之後都會多啲北上發展，因為我鍾意講普通話。」

夜店打碟

Maggie坦言於內地工作酬勞比較高，除拍戲外，她今年會接內地登台騷和到夜店打碟，豪言要全力吸金，但她強調不會把基地北移，她說︰「任何地方有工作機會我都會珍惜，但唔一定要札根內地，喺香港做嘢我都好鍾意。」

文︰專案組 攝︰沈健程

場地︰Club Ranee

服裝︰Come in collection@Laforet