周秀娜：點解寄人籬下？
出身小康的周秀娜，年僅8歲便要跟父母分隔兩地，寄人籬下，因太久才見一次，她經常做出任性行為，希望得到父母着緊，但長大後她明白到父母的苦心，故現在要把最好的給父母，藉此報答他們。
10歲時我由潮州嚟香港，記得之前兩三年，我父母同哥哥已經去咗香港，而我同細佬就喺鄉下親戚屋企住，父母有時間就會帶一啲香港特產返嚟探我哋，嗰時已經學識獨立，咁先唔會令父母擔心。
媽媽兩邊走
好多親戚都好羨慕我遲啲可以去香港，但我同細佬都唔開心，會諗點解父母會離開我哋咁耐？雖然親戚對我同細佬好好，但點解要選擇寄人籬下？所以我當時好任性，做咗啲好幼稚嘅嘢，佢哋返嚟我特登嬲佢哋兩三日，要話畀佢知點解咁耐先返嚟探我。
落到香港我呢個諗法改變咗，因為我知道佢哋好辛苦，爸爸做生意養全家，媽咪要照顧我哋經常兩邊走，又要幫爸爸手，所以我覺得當時嘅行為好幼稚，而且聽媽咪講爸爸為咗我哋有個好嘅成長同讀書環境，申請成家嚟香港，但申請其實好難，爸爸要一個人住喺香港先，一個人孤寂喺香港生活一年，又冇得返鄉下探我哋，我聽到後覺得自己好唔啱，所以我明白到有時唔可以只係為自己，要了解其他人點解要咁做同經歷過啲咩先。
冇反對入行
父母真係好錫我哋，記得細個喺內地食物中毒要入醫院，佢哋即刻放低香港嘅嘢，趕上嚟探我。雖然每個父母都望子成龍，但成日同我哋講「最緊要唔好行差踏錯，唔一定要搵好多錢，最緊要開心。」亦冇反對我入呢行，雖然佢哋唔熟悉娛樂圈，會好擔心，但只要我做得開心同我鍾意，就冇所謂。
因為我依家自己出咗社會做嘢，知道搵錢辛苦，同父母關係仲close過以前。喺我心目中，佢哋係超人、英雄，咁辛苦養大我哋，真係無所不能！依家我事業有啲成績，有責任畀佢哋過得舒服，希望佢哋衣食無憂，唔使再擔心我哋四個仔女。（完）
後記：女鐵人
找周秀娜做訪問確實相當困難，大部分時間她都在內地工作，訪問當日她剛從內地回港，並要出席兩個活動，工作排得密密麻麻，雖然見她面露點倦容，但仍毫無怨言，她更向小記說︰「慢慢影，最緊要影出嚟靚。」這位女鐵人真叫人佩服。
口述︰周秀娜 筆錄︰專案組