軒仔直斥：拆僭建拆埋個膊
特首候選人唐英年昨開記招解釋大宅僭建之「偉論」，即成全城話題，眾星在微博冷嘲熱諷兼怒插，張敬軒直斥「拆僭建拆多咗，拆埋個膊」；而曾是「挺唐」派的黎明和周星馳均告「潛水」，前者身在哈爾濱未有回應，後者亦因工作未有接聽電話。
唐英年與妻子郭妤淺昨晚召開記招回應僭建一事，唐英年的「偉論」再加郭妤淺「攬晒上身」，即成為全城熱話，娛圈不少藝人都在微博冷嘲熱諷唐英年，當中以張敬軒最抵死，直斥：「拆僭建拆多咗，拆埋個膊……」又話香港真係勁過荷里活！他接受電話訪問時直言作為政治人物，打溫情牌要睇場合，覺得對方的智囊團好差，處理危機亦好差。
袁彌明：低級錯誤
除了軒仔，其他歌手、模特兒和藝人也當成笑話一則來看，方皓玟笑言估不到睇新聞可以笑到流眼水，鄧梓峰則指「香港又一創舉」，楊梓瑤則反問：「唐生，你嘅膊頭突然收窄咗，定你太太嘅膊頭突然加寬咗？你嘅行為唔好講話選特首，就連做男人嘅資格都無呀！」莊思敏亦暗寸說：「代表佢嘅膊頭生咗喺老婆度，呢啲講係咁講，信唔信有眼睇。」
不過，平日屬「時事判官」的袁彌明則說：「事件有指話佢賴老婆，我覺得唔緊要啦，反而佢賴同老婆06、07年感情低潮嗰度就搞笑啲囉，我認為佢可以唔講呢句！我覺得唐英年參選特首嗰陣就應該要用水泥封咗佢，呢個係低級嘅錯誤。」
記招前曾以「硬膠」做話題拍短片諷刺唐英年的詹瑞文，昨日在記招後表示：「無論係咪選特首，正常男人點會唔知間屋僭建？我覺得佢落選香港會少咗好多笑話。話因感情缺失而處理唔到件事？點會用咁嘅藉口嚟解決呢件事架？佢嘅誠信會直線下降。個公關都好差，點會畀啲咁嘅金句佢講？真係擰晒頭、扣晒分。」
至於一班被指是「挺唐派」的藝人如黎明、譚詠麟等，黎明則因身在哈爾濱電影節未有回應，而譚詠麟則在微博指「做特首真係光宗耀祖？」至於曾開口力挺唐英年的周星馳，則因身有工作未有接聽電話。文：影視組