周秀娜友助手：唔再lonely
周秀娜近月經常隻身到內地不同地方工作，離鄉別井，難免感孤獨，她慶幸有當地助手在工作時間以外跟她朝夕相對，一起經歷喜與悲，更把對方當作自己的傾訴對象，因而盡交知心好友，即使工作完成也會保持聯絡。
搵「人仔」係一個趨勢，幾年前開始機會逐少逐少咁嚟，其實我都開心，可以去其他地方做嘢，雖然都幾辛苦，瞓嘅時間唔多，但拍戲可以做到自己鍾意做嘅嘢，成果會係慢啲，但呢份滿足感其他嘢畀唔到我，而且冇不勞而獲，我唔會因為辛苦而放棄，唔通坐喺度就有錢咩？
去第二度做嘢因為得我自己一個人，又冇娛樂、冇得見屋企人同朋友，都會覺得孤獨，所以我去每個地方我都會請當地助手，除咗工作上幫我，最重要係陪我！喺第二度最親就係助手，我當咗佢哋係我喺內地傾訴嘅朋友，係唯一take care我生活和工作上的partner，有咩事大家都會一起分享，可以講係「相依為命」。有啲助手就算我完成當地嘅工作，仲會keep住聯絡，所以我離開香港做嘢，除咗見識多，仲會識到好多交心嘅朋友。
睇蕭敬騰拉近距離
記得上年平安夜，我喺內地做嘢，劇組當日早收，但我冇返到香港，因為之後嗰幾日要開工，咁啱之前同蕭敬騰合作完後成為朋友，佢就寄兩張平安夜舉行嘅上海演唱會飛畀我，我亦冇叫香港朋友或者男友上嚟睇，費事上嚟半日就要返香港，我就請當地助手去睇，估唔到佢全晚都睇得好開心，邊睇邊嗌，令我有種好得意嘅感覺，大家好似識咗好多年嘅朋友咁。
雖然上年我有好長時間喺內地做嘢，要離開屋企好耐，但我冇後悔，因為做到自己想做嘅嘢係好幸福嘅事，而且因為北上工作先有機會投資生意，更加慶幸我可以喺唔同地方都識到一啲交心好友！