Eason摸胸掃Pat舌戰何韻詩
陳奕迅（Eason）和何韻詩前晚在黃偉文作品展演繹情慾版《芳華絕代》，為超越已故巨星梅艷芳和張國榮的絕響演出，Eason向阿詩施擒拿手摸胸又摸Pat，甚至將她的頭按近「小Eason」，兩人還肉緊地伸脷激咀，辣慶全場，容祖兒坦言睇到暈一暈，Eason女兒康堤更被嚇親！
前晚黃偉文（Wyman）作品展尾場，祖兒、彭羚、Eason、黃耀明、吳君如、薛凱琪、梁漢文、盧巧音、李蕙敏、王菀之、陳曉東等傾力演出，彭羚和擔任神秘嘉賓的大肚千嬅，掀起一浪接一浪的高潮，但最叫觀眾嘩然的，就是穿西裝長裙的Eason和着踢死兔化身男人Look的阿詩，扮梅姐和哥哥演繹情慾版《芳華絕代》，兩個「男」人在台上又啜又摸，睇到逾萬觀眾尖叫拆天。
祖兒感觸落淚
當音樂響起，坐在梳化的Eason升上舞台，阿詩邊唱邊走近他，Eason先向阿詩摸Pat，再慢慢掃上背脊，然後阿詩就坐在Eason大髀上，動作一步比一步火辣，阿詩轉而跪在Eason面前，Eason將她的頭按近下體，兩人脷疊脷激情濕吻，最後Eason伸左手入阿詩的西裝褸內摸其胸部，還旋轉了半個圈，全場嘩然。
另外，祖兒唱《黃色大門》時唱到眼濕濕，獲觀眾拍掌支持，她說：「衷心多謝黃偉文，佢令我歌曲有好多生命，識到佢好威，佢個腦裝好多嘢，呢啲眼淚一滴一滴好感動。」
囡囡目擊嚇親
完騷後，一班歌手和Wyman在後台開香檳，祖兒High到將香檳噴射，場面熱鬧，之後Eason和阿詩雙雙受訪，對於兩人脷疊脷，阿詩先發制人說：「佢先o架，呢個構思係佢諗出嚟，因為原唱好經典，Eason想有突破，不過錫完佢之後生痱滋。」Eason卻否認主動：「我冇伸脷喎，係佢伸先，我咪唔蝕底，你係咪虎狼之年呀，我感覺到佢主動喎，而且我冇摸胸，只係輕撫。」Eason謂激情演出是為超越梅姐和哥哥，不過在台下的女兒康堤卻被嚇呆，他說：「囡囡話見到茹茹（阿詩）和Daddy有啲嚇親，早熟啲啫，冇嘢嘅。」
「白雪雪嘅脷苔」
祖兒坦言在後台睇電視畫面，全程目擊Eason和阿詩的精彩演出，她說：「唔錯過得，真係暈一暈。」問覺唔覺得阿詩蝕底？祖兒說：「我又唔係阿詩，為演出無可厚非，佢哋又係專業歌手。」祖兒還取笑Eason：「我見到佢條脷有白雪雪嘅脷苔，不過佢哋好似摔角咁。」此外，網友對Eason和阿詩的舌戰及摸胸一幕亦反應激烈。
文：音樂組