周秀娜：幾紅都唔可以變心

同男朋友Avis拍拖差不多6年，感情一路都好穩定，就算我入咗呢行都冇乜大影響，有人話娛樂圈係一個大染缸，有好多誘惑，因為工作關係身邊一定有唔少異性，但我清楚自己只係工作，而男友對我好有信心，仲好支持我添！Avis認識真正嘅我，我同佢約喺7年前一個模特兒工作認識，大家拍拖時我未正式叫做入呢行，所以佢喺好多人認識我之前，已經好了解我，我同佢嘅感情真係好深厚，到依家都冇變過！

喺我考慮選擇入呢行嗰時，曾經有同男友為呢件事爭論過，因為佢之前有個女朋友由Model入行做藝人就變咗，佢擔心我入咗行之後會咁，所以唔知畀唔畀我入行好，但最後大家有共識，會不斷提點大家幾紅都唔可以轉變，呢一個係感情上嘅轉捩點。

男友值101分

感情係一點一滴累積，兩個人一齊時間耐咗，相處時開心就得，佢平時對我好細心，會留意我平時需要啲乜，好似佢試過特登親自整個貼石iPhone套（左圖）畀我，而佢知我要出Trip做嘢，因為我好鍾意食零食，佢會買好多袋零食上我公司，多到我食唔晒要拎返香港，雖然呢啲唔係重要經歷，但呢份心意我好感動，每次都覺得好窩心，因為佢係一個做足101分嘅男友，真係好體貼，或者呢個就係我同佢感情咁深厚嘅原因。

講心唔講金

上年有好多工作機會，收入增加，唔少人自然拿我跟男友比較，有人會覺得我搵錢多過佢，但錢呢樣嘢係外面嘅人睇法，真實一面你哋都唔知，喺我心目中，佢已經係事業有成，擁有自己的事業，Model只係佢間唔中先會去做。我同男友唔會去衡量邊個搵錢勁啲，感情係冇得比較，而且我唔會在意外面的人去比較。

另一個自己

過多一年大家就拍拖7年，有人話7年之癢好難過，唔係咁睇好，但我覺得同佢「敵得過」，依家大家見面少咗，但見面多與少唔係問題，感情係要睇吓雙方肯唔肯去維繫，反而每一次見面先有新鮮感，所以情侶感情有問題，可以建議去吓旅行，唔好成日見。我會形容同佢之間嘅關係係情侶，更會係家人、朋友同知己，有多重身份，佢好似我嘅影子，我唔需要講出口佢都知我諗緊咩！

口述︰周秀娜

筆錄︰專案組

服裝︰Guess