禁影相 落台搶相機 雲妮香港開騷唱崩牙

雲妮於88年11月來港首度在紅館舉行一連三場演唱會，亦是陳太（陳淑芬）第一次搞黑人歌手演唱會。雖然外界指雲妮臭脾氣，但陳太卻讚她為人nice：「佢有晚唱歌時被支咪撼崩隻牙，因為喺前面唔好睇，所以佢要整番，嗰日仲係假期，我咪幫佢搵相識牙醫。」

喬裝落街買薄餅

身為國際巨星的雲妮對住宿雖有要求，但安頓後卻毋須主辦商照顧。據陳太所知，雲妮會喬裝落街食薄餅。她說：「通常外國星來港，我哋都會帶佢四圍食同遊覽，但佢就唔使我哋理，佢包住頭去啲小食店買pizza食。」不過跟外國星合作規矩多多，例如有關方面曾要求大會在紅館後台以布搭建一條隧道，讓雲妮在沒有閒雜人等騷擾下直接登車出入。陳太說：「最終我哋冇整隧道，佢出入個位冇畀人企喺度。」

但令陳太最難忘是雲妮方面嚴格執行場館內的觀眾不能拍照，當雲妮在台上獻唱時，發現有觀眾舉機影相，她親自走落台，佯裝問觀眾是否想合照，觀眾聞言開心得拿相機跟她拍照後，雲妮即沒收對方相機並交給保安拆菲林，現場即噓聲四起，陳太說：「係唯一一個遺憾。」

三場個唱有錢賺

對於雲妮逝世，陳太大感惋惜：「好難得有個黑人靚女歌手，佢把聲又咁靚，近年見到佢咁多負面新聞，都好可惜。」陳太聽聞雲妮戀愛大過天，其經理人不敢讓她接觸其他人，怕影響情緒而失控。當年雲妮身價好高，但三場演唱會全爆，陳太坦言有錢賺。另外，雲妮於99年底再度應邀來港在灣仔會展參與千禧音樂會演出，當時她派頭十足，一行四十多人浩浩蕩蕩來港。

文：音樂組