祖兒閃Bra勁跳打頭陣

黃偉文（Wyman）的一連六場「Concert YY黃偉文作品展」昨晚於紅館開鑼，大部分獻唱過其作品的包括容祖兒、黃耀明、薛凱琪、陳奕迅、何韻詩、張敬軒、周柏豪、鄭融等擔任嘉賓，就連闊別舞台多年的彭羚亦唱出金曲《小玩意》，更分別與祖兒、黃耀明合唱《心淡》及《漩渦》，吸引劉浩龍、徐濠縈、徐子珊及莊思敏等捧場。

Ready好世界末日

祖兒以閃Bra、閃長手套襯黑色西裝閃Look打頭陣示人，其中一套是MMM的服裝品牌，她在多名「雌雄同體」男舞蹈員伴着跳住出場，接住黃耀明與已故巨星張國榮隔空合唱《這麼遠那麼近》，而薛凱琪則在半裸男舞蹈員傍住出場。

Wyman化身「炸彈人」，認真搞笑。

黃耀明穿Gareth Pugh外套示人。

貪靚的Wyman分別以開窿西裝及手榴彈Look亮相，他說：「經過呢6場，自己已經Ready好可以世界末日，第一次嚟紅館係睇梅艷芳演唱會，當時決定自己要上紅館舞台，但好快就知自己唔唱得，所以喺咁多年嚟好努力填詞。」

聽醫生勸告勿操勞

據知，懷孕7個月的陳慧琳（Kelly）原本擔任昨晚的嘉賓，但最終缺席，其經理人公司發言人說：「Kelly個肚好大，醫生叫佢唔好咁操勞，Kelly唔想屋企人同老公擔心，所以唔好意思咁推咗，希望Wyman盡快開Part2，到時一定撐場。」Wyman亦祝福她生個健康的BB。至於開騷前的拜神儀式，阿詩與祖兒全程零交流，各據一方企到無雷公咁還，祖兒不停與Eason吹水，阿詩則獲Wyman捉住取暖。另外，表演歌手祖兒、阿詩、謝安琪、Twins、Eason、薛凱琪則獲Wyman代訂造Giuseppe Zanotti Design品牌靚鞋。

文：音樂組