陳嘉桓：多謝粉絲給我正能量

去年年尾，雖然經歷了最壞的境況，但很感恩，我身邊有屋企人、師傅冼國林以及fans，給予我無限量支持。事件發生後，母親即到內地陪伴我、開解我，爸爸、弟弟亦每日一電，爸爸仲講唔少笑話畀我聽，希望逗我一笑，好多謝佢哋！除了屋企人之外，師傅冼國林都好錫我，幫我主持公道以及耐心地教導我，嗰段時間剛剛是師母即將臨盆的日子，但師傅都抽出時間去幫我，師母亦好體諒我，好擔心我，要兩人為我嘅事如此操心，之後真係要好好工作報答他們！

我在內地拍戲的日子，fans們不停在微博留言支持我，有些更動手畫了心意卡送畀我，當中，令我最感動的留言便是佢哋不停跟我說：「希望你那八隻牙快點出番來！我們不想見到你不開心，你以前經常給我們正能量，現在我們希望可以給你！」感覺很窩心！

冼師傅陪Rose度過去年最艱辛的日子。

Rose在生日會上與粉絲玩自拍。

與粉絲以友相待

除了在我不開心時陪住我之外，粉絲們在我入行至今，一直都做了不少令我很開心嘅事，記得去年中秋，我們相約ＢＢＱ聚會，當時他們做了很多印有我不同名字嘅月餅，「Rose」、「嘉桓」甚至印有玫瑰圖案嘅月餅，很有心思！而我都好鍾意不時向他們送上一啲小心意，好像之前到雲南拍戲，剛巧聖誕節將至，我便畫了一張聖誕卡送畀他們；最搞笑嘅一次，我在橫店拍完戲，於機場見到一條金華火腿，係整整一大條的金華火腿，我特別去買了一條放在背包，回到香港猶如「拔劍」般從背包把火腿抽出，引到佢哋哈哈大笑。

我覺得藝人與粉絲之間，像朋友一樣相處，係一件很快樂的事，佢哋覺得我給予佢哋正能量，同時佢哋也一樣給了我很多正能量，多謝佢哋！

口述：陳嘉桓

筆錄：影視組