楊汀叮殺入模界 Baby帶挈
今年26歲的楊汀叮入行前猶如迷途小羔羊，儘管有八級鋼琴和三級芭蕾舞的底子，又是電腦工程的大學生，但坐唔定的她，發覺多姿多采的娛樂圈十分適合自己，結果在Angelababy的引薦下，終成功踏上模特兒之路。
拒做白領
我06年已經入行，當時一邊讀書一邊兼職做model，拍平面廣告、幫雜誌影相乜都有。因為鍾意扮靚，諗住做呢行可以接觸到好多靚嘢，又可以賺到錢，一舉兩得。所以當時有電影公司搵我試鏡都全部推晒，因為自己唔識，又冇朋友做過，而且爸爸媽媽都係保守嘅人，話晒我讀大學，應該做白領，唔好拋頭露面！就係咁搞到我想做與唔想做之間，經常浮浮沉沉，冇晒方向感。
遇上伯樂
做嘢時識咗Baby，當時佢已經好紅，以為佢都係貪慕虛榮先做模特兒，但原來佢喺工作上都有自己嘅堅持，又冇曳，令我有番方向感想去試。而我又想搵間好啲嘅公司，於是Baby介紹咗佢嘅經理人Kim畀我認識，一拍即合。當初屋企人都有反對，驚我學壞，但我一向都唔會夜蒲，又唔會落酒吧，都係咁返工放工冇乜嘢，佢哋先放心咋！而且出道以嚟，我都幾滿意自己嘅成績，係距離第一桶金（100萬）仲好遠啫！
積極搵銀
其實我經濟負擔都幾大，爸爸患有淋巴癌，試過翻發，當時真係使咗好多錢！家姐有小朋友唔可以長期倚賴佢，但我積蓄又唔多，所以依家要積極搵錢，做好呢份工！其實屋企人好錫我，我自問唔係港女，但切個水果都驚(界刂)親手，媽咪同家姐又要返工，所以為咗照顧爸爸，我學識咗煮嘢食，最拿手就係蘿蔔炆牛腩。
愛上演戲
未來除咗模特兒工作外，最想就係拍戲！之前拍嗰套《全城熱戀熱辣辣》唔算，因為發揮唔多，所以當時興趣唔大。上年3月跟咗張達明學戲之後，鍾意咗做戲，因為做model始終有個框框，加上我以前好怕醜，啲人成日叫我喊包，但被佢哋「折磨」後，又要扮癲，又要趴地，喺人面前喊晒口，已經可以豁出儀態，即時令我開竅。所以如果有個發揮嘅角色畀我做，做醜女都願，最緊要有個機會啫！
我的優點
我以前做嘢諗住是但求其搵兩餐，但依家年紀唔細，明白到市場競爭大。初初出道，覺得自己唔係好靚，但又唔係話醜樣；身材唔係好勁，但睇落都唔算乞人憎。所以男女fans都有，啲客戶又好鍾意我，可能我親和力強啩！加上我笑起上嚟雖然唔算好sweet，但都幾cuteo架！
打死不離三師姐
熊黛林、姚予晴同Baby都係我師姐，我哋感情好好，乜都會傾。佢哋嘅共通點都係傻大姐一名，但靚女、高貴又冇架子，令我覺得好親切。
熊黛林
外形高大，恨都恨唔到，做人處事又成熟，而且好開朗，好肯幫人。
姚予晴
佢皮膚真係好靚，做嘢又細心，不但肯提攜後輩，仲好有大家姐風範。
Baby
個樣標致，忍耐力強，而且佢係鐵人打不死，因為佢做極都唔會攰o架。