俞琤派利是DJ寸嘴贈興

俞琤結束與超瓊八日歐遊溫馨旅程，出席昨日電台的新春團拜活動，因被踼爆「瓊俞」關係，俞琤成了傳媒焦點，坐在主家席的俞琤仍表現輕鬆，與同事有講有笑，但不時左顧右盼，似刻意不望傳媒鏡頭。

潘小濤帶頭「作反」

「瓊俞」關係成為全城熱話，難怪DJ潘小濤上台講賀詞都「唔怕死」要「抽水」玩俞琤，公然說：「YT祝你身壯力健、心想事成、旅遊開心！」一句「旅遊開心」即引起全場起哄失笑，連阿Jan林海峰都忍不住搭嘴：「雖然講得短，但係精。」而被揶揄的俞琤惟有「焗笑」畀反應。而身為俞琤愛將的阿Jan，之後趁潘小濤與節目監製表演舞劍時，即抵死大嗌：「潘小濤炒咗佢啦！」來為俞琤出氣。事後問到潘小濤可怕真被「炒魷」？他表示不作回應。

俞琤被一班下屬玩完之後，急到尖沙咀醫肚。

俞琤大派利是，但仍逃不過被追問與超瓊的關係。

團拜尾聲，俞琤一如慣例向現場傳媒派利是，當被要求講Pansy時，俞琤則保持笑容表示：「我咁多年都冇做訪問，冇嘢好回應。」講到Pansy在機場被問到俞琤是男友表現如沐春風一事，俞琤則用「派利是」做擋箭牌，更充耳不聞只不停說：「利是、利是、恭喜發財。」全程俞琤笑容滿臉，卻未有否認與Pansy的「瓊俞」關係，之後即匆匆閃到電台大樓內。

之後俞琤前往尖沙咀福臨門食晏，逗留個多小時後離開，再問到與Pansy感情是否穩定及結婚等問題時，俞琤都未有回應，記者祝她「新年快樂、甜甜蜜蜜」她一臉微笑甚為受落。跟着俞琤往半島酒店，是否約了Pansy亦未有作答。

葛民輝：我個節目會幫人示愛，鯨魚係受保護嘅。	潘小濤（右）「作反」，林海峰幫俞琤出氣：「炒咗佢啦！」	森美：見怪不怪，冇得話唔襯o架！

下屬爭住恭喜YT

阿Jan主持的節目例必要講A1新聞頭條，問阿Jan可講「瓊俞」歐遊事件？Jan抵死說：「咁鯨魚（瓊俞）係受保護動物。」在旁的葛民輝則得戚說：「好彩我節目係等人打電話入嚟，如果有人示愛或者拍拖紀念日都會幫手嘅！（幫YT慶祝情人節？）鯨魚都話係受保護動物咯！」阿Jan堅稱沒有在節目避談，笑言：「冇避，我冇喺香港見過鯨魚。（瓊俞遊咗去巴黎？）我冇喺香港見到唔能夠作出評論。」瓊俞在巴黎世紀拖手？阿Jan啜核說：「鯨魚識拖手？乜唔係噴水咩！」

至於一眾DJ亦不禁開腔笑談「瓊俞」，艾粒的Donald和少爺占亦說要恭喜YT，Donald更讚：「佢哋平時都係工作領導人，能令佢笑嘅人出現咗幾好呀。」而小儀指兩人地位上襯到絕，森美則笑言拖手很平常，見怪不怪，冇得話唔襯o架！

文：音樂組