陳嘉桓自畫tee湊年宵熱

農曆新年將至，行花市湊湊熱鬧，感受濃濃過年氣氛，當然是賞心樂事。若你有一個年宵攤位，會想賣甚麼物品？不少名人明星選擇售賣地道風味小食，讓人們在寒風中吃着熱騰騰的美食；歌手鄭融則會賣CD刺激唱片業；女星陳嘉桓則善用專長，親手在T-Shirt上畫出美麗花龍贈興！

陳嘉桓：「返學時有諗過賣T-Shirt，自己畫啲圖案上去，因為我鍾意畫畫，自己畫嘅嘢又唔怕同人撞款，嚟緊龍年，我會畫啲花龍囉。」

汪圓圓：「我想賣賀年嘅中式食品，例如蓮藕餅咁，啱晒一家大細行年宵，通常小朋友會鍾意食呢啲小食！」

汪詩詩：「我會擺即影即有嘅影相攤位，用新年嘅裝飾布置背景板同埋相架，等啲人行年宵都可以『留低』快樂回憶。」

趙嘉懿：「新年天氣凍，又多人行年宵，通常都有排行，所以擺熟食檔應該會好受歡迎，我會賣特色啲嘅小食添，魚蛋、魷魚餅、小杯裝拉麵等。」

蔣怡：「賣曲奇餅！我見外國有啲好大塊嘅曲奇餅，喺香港未見過，所以呢樣嘢都幾有特色架！」

鄭融：「我會想賣CD，刺激吓唱片業，依家啲人少咗買CD，見到都難，所以我新、舊CD都會擺出嚟賣，唔同年代嘅歌手都有。」

陳法蓉：「我好鍾意狗仔，成日幫自己隻狗扮靚，我會賣狗仔衫，新年會賣旗袍裝或者有賀年字嘅衫仔，應吓節嘛。」

榮雪梅：「我想賣啲有香港特色嘅地道嘢，例如小食、飾品，之前喺日本機場見到佢哋賣啲特色土產，唔似其他機場咁得啲名牌，我覺得好warm，好有人情味同埋好有代表性。」

蔡穎恩&陳嘉寶：「我哋會一齊夾份開檔賣手袋，會想賣啲斯文類型嘅款，大人、細路都買得起，細路仔可以送畀媽咪，男士可以送畀心愛嘅人。」

莊思敏：「我會賣魚蛋、燒賣呢類可以邊行邊食嘅，又或者賣女性內衣，我覺得好多女仔都鍾意買架，就算啲貨賣唔晒，自己都可以着番或者送畀朋友嘛，仲會設計啲揮春T-back應吓節添。」