Suki解構馬賽 娛圈清泉0雜質

充滿佛學智慧

S：徐淑敏（Suki）　馬：馬賽　

S：2011年你嘅成績好好，仲攞咗台慶「飛躍進步女藝員」獎，好開心，新一年有咩期望？

去年台慶拿下「飛躍進步女藝員」獎，是馬賽演藝生涯一大肯定。	劉松仁（右）戲好又肯教人，馬賽（左）獲益良多。	Suki（右）、馬賽三年姐妹情，感情要好。

馬：上一年確實係好有收穫嘅一年，我當然希望新一年工作、事業都有提升，繼續「飛躍進步」，更加希望新一年好似上年咁，拍嘅劇集都咁受歡迎！

馬賽（左）、吳卓羲	徐淑敏：「你會為愛情放棄事業？」	馬賽：「仲未到嗰個時刻！」

S：喺我眼中，你係個好乖、好有佛學智慧嘅女仔，做每件事、答問題都好中庸，但喺娛樂圈發展，會唔會覺得幾難突出自己？

馬：我覺得每個人處世方式都有唔同，可能因為我嘅性格，令我會搵少好多錢，有兩年時間我埋頭拍劇，完全冇公開見過人。但我覺得每個人價值取向唔同，我有自己嘅生活方式，可能人哋會有其他行娛樂圈嘅方法，但我做唔到，就算做咗都唔開心，不如做番自己。

阿姐循循善誘

S：我知道你好喜歡演戲，但初初入行，一定會由一啲唔起眼嘅角色做起，會唔會有啲唔開心？

馬：冇，反而我拍《女王辦公室》時，劇組每個人都好錫我，最難忘阿姐（汪明荃）同我講，想做呢行就要學好廣東話，可以好似劉嘉玲咁，一步步嚟！記得拍《女》劇有場戲，我同吳卓羲都要演得有少少慘嘅，導演叫我做得戲劇化一啲，我當時唔係咁識點演，阿姐就一直陪住我，仲同我分析角色，佢真係好肯提攜後輩，好多謝阿姐。

超級偶像松哥

S：拍劇有冇遇過一啲好辛苦嘅經歷？

馬：拍電視劇《耀舞長安》係體力上嘅辛苦，因為有好多大場面又有跳舞戲份，拍嘅時間又長，曾經試過開四十幾個鐘期間偷偷睡一睡，又試過凌晨收工再接朝早嘅《九江十二坊》，真係幾吃力，但心境上OK。

S：有冇冧過廠？

馬：我就冇，反而有一個同事冧咗，令我可以有一日休息。

S：你咁鍾意演戲，邊個藝人係你偶像？

馬：宣萱、歐陽震華！能夠有機會同佢哋合作，真係好開心，依家仲有一個super、super偶像——劉松仁，松哥喺《名媛望族》入面做我爸爸，我好鍾意佢，佢博學、有內涵，我演戲都有一段時間，積埋積埋有好多有關做戲嘅問題，松哥都可以一一答到我，好多問題都能迎刃而解，加上松哥人生經歷豐富，好有思想、好有自己嘅哲學，佢係我一個目標！

搵朋友平衡吓

S：我覺得你係娛樂圈裏其中一個清泉，冇雜質影響到你，你會好清晰知自己想要做乜，冇人能夠改變，只會令你堅持做得更好！不過，我覺得如果你能夠多啲搵朋友就更加好，你實在太愛你嘅事業，其實各方面都要平衡吓，朋友都好講緣分，要識把握珍惜，成日唔搵人，友誼會走架！未必人人都好似我同你咁，好耐唔見，再見都可以好close。

馬：明白！我哋識咗三年，你真係我入行嘅老師，我第一個節目就係同你拍，你教咗我好多嘢。你知嘛，你唔笑個樣有啲惡，所以初初我都有少少驚你，後尾合作落去先發覺你對人好好。我做節目講錯嘢，都即刻幫我兜，食飯着衫又會同我分享，雖然你結咗婚，但我覺得你喺娛樂圈好有潛質，好聰明、外柔內剛。

成緋聞受害者

S：你入行以嚟都好少緋聞，最近只有一單吳卓羲，但我一睇就知你哋冇可能，因為兩個都唔係喜歡對方嗰類型。

馬：呢件事我好唔開心，之前出劇集傳緋聞就當宣傳，算啦，但事情過咗一年，突然又傳番出嚟仲做埋雜誌封面，我都唔知發生咩事？因為內容寫我好無辜、畀人蝦，有人就質疑我想博出名，叫人寫緋聞，其實我都係受害者，如果有人咁諗，對我好唔公平！當時我決定收埋自己。

S：咁似乎唔係咁經得起風浪，為咗一宗緋聞收埋自己？

馬：最主要係質疑我誠信嘅問題，當時媽咪喺內地嚟香港陪我，我唔係鄙視人哋放料造新聞，但唔係我嘅方式，畀人咁樣質疑，好難受，惟有講時間證明一切。

當面讚惹人妒

S：轉個開心啲嘅話題，我初初同你做節目，曾經好唔識做喺化妝間當住幾個同事面前讚你實好有前途，當時我感覺到你身邊嗰兩位同事好似不是味兒，哈哈……我真係冇心架！不過，我好喜歡你對演戲嘅決心同毅力，嗰種決心，真係路人甲都feel到，好想講你第時一定會好好。唔……你會唔會為愛情放棄事業？

馬：唔會係依家，未到嗰個時刻，我以前有個男友，因唔喜歡我做演員最後分手收場。我鍾意演戲，好想做演員，讀書時已經好愛去表演、做舞台劇，機緣巧合行到呢一步，唔會放棄，因為好難得做到由細到大都想做嘅事。

S：咁我希望你將來事業更上一層樓，幾年後可以愛情、事業兩得意啦！

文：影視組

攝影：李柏儒

場地：台灣一品花雕雞（銅鑼灣）

徐淑敏

化妝：Tiffany Fong @ 26 Production

髮型：Eas Fu @ Chin. G

馬賽

服裝：Rosebullet

髮型：Sidney@Hair

化妝：Sire Ma