Eason坐輪椅歎過做皇帝
陳奕迅（Eason）前晚與王菲於北京綵排春晚節目，早前趁完成頒獎禮後，進行韌帶手術治療的Eason暫時收起調皮，以輪椅代步，Eason變跛神！Eason笑言手術後獲工作人員處處照顧，恍如皇帝上身。
Eason、王菲、孫楠、張衞健與太太張茜、蔡卓妍、王力宏等前晚現身北京，為中央電視台製作的春晚節目綵排，早前接受第二次腳部韌帶手術的Eason撐着拐杖與王菲合唱《因為愛情》。
北京醫生睇住
由於手術後醫生建議Eason要多作休息，故盡可能以輪椅代步，平日愛跳跳紮的Eason，無奈變成跛神！Eason說：「醫生同公司怕人多地方可能唔係人人留意到我腳傷，避免碰撞先坐輪椅，經理人仲特別喺北京請咗個醫生幫我睇住，個個都好小心照顧我，好似皇帝咁，真係有啲唔慣。」由於坐輪椅現身，Eason在後台頓成焦點。
Eason手術後傷口復原理想，但因水腫未消，被眾人封為「金剛腿」，Eason說：「做完手術嗰陣仲腫，好似棵樹咁，依家好啲喇，由大樹變金剛腿。」將休息至3月的Eason表示屆時應完全康復，配合4月倫敦演出，由於去年8月接受第一次手術時已知需時休息，其公司早已將工作時間調配，故Eason並無錯失搵銀機會。
張衞健追龍B
與Eason合唱的王菲，綵排後便在工作人員簇擁下離開，並未有接受訪問。同場的張衞健夫婦首次攜手於春晚亮相，更笑言望抱龍B，實行sweet住迎新年；至於地位超凡的孫楠大哥將演出《把幸福給你》，將愛分享，向來只報時事的新聞聯播更破格報道有關孫楠再度於春晚亮相消息。
文：音樂組