Jeana Iris夜店廁所開拖
今日各家各戶都食年夜飯，喜氣洋洋，想不到經常隔空對罵的o靚模Jeana（何佩瑜）及「爆E超蓮」Iris（鍾采羲），未到初二已「開年」！據知昨日凌晨兩女在銅鑼灣夜場狹路相逢，疑兩杯落肚的Jeana得悉被人在廁所嘲諷是「整容怪」後，即火爆衝到廁所外質問兼踢冧門，更與Iris先展開罵戰，繼而「開拖」！
以「不倒胸」成功出位的Jeana，出道以來不斷辣火頭以抬高聲勢，自去年寫真戰以來，與「爆E超蓮」Iris因隸屬不同經理人公司而經常隔空罵戰。結怨多時的兩女，昨日凌晨被目睹於銅鑼灣夜蒲期間狹路相逢，未「開年」先「開拖」！
有酒客事後透露，Iris和Jeana兩班人馬前晚（周五）先後腳到達樓上夜店，玩至凌晨時分，各人都略有醉意情緒高漲，未幾Iris和數名姊妹在女廁內高談闊論，期間有人譏諷Jeana：「嘩！個『整容怪』都嚟咗喎。」
拉隊極速清場
誰料Jeana的女友人亦剛巧在廁內，並急急把事件告訴Jeana，火爆的Jeana聞言後衝到廁所門口，大聲叫罵：「邊個講我係整容怪？」同時手腳並用又拍又踢門，責問邊個講是非，嘈吵聲引來不少酒客八卦張望；突然「嘭」的一聲，廁所大門被Jeana一腳踢冧，正站在門後的Iris首當其衝被撞親肩膊，痛極大叫，兩幫人馬破口大罵，傳兩女更動手「開拖」。雙方友人聞言紛紛衝出拉開兩女，為免事情鬧大更齊速撇。記者昨日凌晨三時趕到現場時，店內已幾近「清場」；昨午記者再走訪現場，發現被推倒的大門已被安回原位，獨剩幾個鞋印。
「佢成個失晒控」」
記者隨即致電Iris，她直言被Jeana撞傷，更說：「見到佢成個失晒控，我真係好驚囉！真係估唔到佢會咁介意人哋話整容，佢都做咗代言人啦！怕咩人講啫？（有冇打算追究？）冇！當佢飲大兩杯，但唔希望有下次囉。（點解唔追究？）間舖係啲朋友開嘅，唔想搞大件事。（係咪你笑Jeana整容怪？）我有聽到人講，但唔係我講。（你有冇還手？）我冇。」
昨日致電向Jeana求證，她承認前晚有到夜店，但問她與Iris開拖一事時即說：「咩呀？邊個Iris？」又指電話無電即收線，其經理人Roy向她了解後回應：「Jeana無飲醉，佢話廁所有人嗌救命咪踢門囉，之後無事咪走，佢話唔識廁所啲人！」至於Iris經理人施念慈則身在外地未及回覆。
Jeana何佩瑜
花名：嫩版范冰冰
年齡：23歲
三圍：33C、24、34
公司︰GME模特兒公司
作品︰寫真集《Girls Look Book Volume 2》和《The Sexy Grand Master》、電影《喜愛夜蒲》和《熱浪球愛戰》等
Iris鍾采羲
花名：爆E超蓮
年齡：24歲
三圍：35E、24、34
公司︰Jacso模特兒公司
作品︰曾推出寫真集《Inside》和《What's Up》
文、攝：追蹤組