今年是陳豪與陳茵媺拍拖後首個新年，陳豪昨日出席活動時表示會帶女友到屋企拜年逗利是。明顯清減不少的他承認正努力減肥，至於何時做新郎就笑住表示「慢慢嚟」。
陳豪昨日出席「又一城．騰龍飛躍迎新歲」，與模特兒Marina V.及楊汀叮即席揮毫寫揮春。現場所見陳豪清減不少，他坦承正積極減肥，已成功減掉6磅，即被記者取笑要瘦身做新郎，他聞言笑不攏嘴：「呢啲嘢要慢慢嚟。其實係之前播《天與地》，好多人都話想見番之前嘅陳豪。我覺得係時候的起心肝，放低幾磅。（女友陳茵媺滿唔滿意？）我仲努力中。」
提到新年，問陳豪會否向「外父外母」拜年，他即時口快快答：「會用電話拜年，因為佢哋唔喺香港。會買定禮物儲起，等佢哋返嚟先一次過送。」默認未來女婿身份。
陳豪亦不諱言會帶陳茵媺同家人拜年，問到女友是否已入屋？他笑笑口說：「佢之前已經見過我屋企人，今次只係拜年畀封利是啫。（媽咪對女友有乜評價？）佢話好好。（認定係未來新抱？）慢慢嚟。」陳豪表示帶女友回家拜年是基本禮貌，並已諗好新年被人催婚時，會以「我會努力」回答。他又透露本想跟陳茵媺逛花巿，但怕多人而打消念頭。
文：名人組