Kay老公搭路撇環球

有傳Kay的經理人夏森美因保護她而與所屬的環球唱片董事總經理黃劍濤發生拗撬，令彼此關係急轉直下。曾以《囍帖街》唱至街知巷聞的Kay，實力唱功毋庸置疑，故最近傳雙方有意「分手」後，立即引來金牌大風、Neway、星煥等唱片公司有興趣「收Kay旗下」。Kay上周五舉行兩場演唱會，數間唱片公司的巨頭亦有現身「睇辦」，其中金牌大風集團主席龐維仁就孖住集團CEO李文偉（Desmond）睇騷，頻頻密斟。

助改善與傳媒關係

龐維仁接受電話訪問時直認：「第一，我係去睇RubberBand，支持自己公司同事；第二，我真係去睇阿Kay的表現，佢嘅表演才華、認真態度，我覺得係遲早掂，佢老公張繼聰係我哋公司artist，佢有同我提過，所以如果佢哋同環球break up（分手），我哋真係好有興趣，會第一時間提出，甚至可以出錢為佢贖身。」他補充儘管外界傳Kay與傳媒關係麻麻，他認為金牌大風團隊可幫她解決。他揚言已交給集團CEO Desmond跟進，至於外傳他將離開金牌大風，他指私人事不回應。

不排除有任何合作

至於Kay經理人夏森美則回應：「好多謝佢嚟睇阿Kay，咁欣賞阿Kay，但大家未傾過任何嘢，因為我哋同環球都未搞清楚，但都唔排除有任何合作機會。」

文：音樂組