黃宗澤要杏兒生兩件

早前傳出好事近的胡杏兒與Bosco，雖然後來二人表明先搏殺，多等兩年才計劃結婚，但Bosco心中早有生仔計劃，昨日他與周麗淇（Niki）出席活動時，除了互餵日本生果證冇輻射，Bosco獲混血小女孩獻吻時，擺出一副恨做老竇的模樣，問他將來想生多少個？Bosco即口快快說：「想生一仔一女。（生咗先結婚？）咁又冇計劃。」對於小女孩全程嗲爆黐實，Bosco笑說：「呢啲係小朋友特權，女友係咁會毛管戙！」

預演做新娘子

談到李思捷早前揚言待Bosco與胡杏兒分手才公開與女友「春卷」王宝宝的關係，Bosco笑罵思捷是「死仔包」：「拎去啦！佢（杏兒）鍾意咪過檔囉，我冇所謂。」

黃宗澤未結婚已諗定生一仔一女。

胡杏兒、鄭嘉穎手拖手合唱一曲。

期間，大會安排三人分別戴上黃浩然、謝天華及陳豪的面具任Niki揀，但Niki拒揀任何一人做男友：「佢哋有老婆同女友，我唔做第三者。（因為之前經歷過？）唔關事。」

另外，胡杏兒前晚則與好拍檔鄭嘉穎飛赴上海，錄影賀年節目《海派春晚》，杏兒更預演做新娘子，穿起一襲白色拖尾婚紗，但因裙身太長，杏兒為免仆倒顯得步步為營，嘉穎則一貫西裝骨骨型仔look，兩人還手拖手合唱，並向台下粉絲派福袋，氣氛熱鬧。

昨晚擔任華姐評判的杏兒談到Bosco豪言杏兒冇錢使可以問他攞，杏兒冧爆說：「係咪真架？你哋做證呀，叫佢攞個銀行密碼嚟啦！（就快做黃太？）冇咁快。」

文：專案組